(ERGO) – Xaalad cunno iyo biyo yari ayey wajahayaan ilaa 300 qoys, oo u badan xoolo dhaqato oo toddobaadkan ka barakacay deegaanka Hargis iyo dhulka miyiga ah ee ku teedsan oo 26km dhinaca galbeed kaga beegan degmada Balanballe ee gobolka Galgaduud, waxaana sidoo kale aysan heysan wax hoy ah oo qabowga iyo qoraxda ay ka galaan.
Waxaa ku khasbay in ay guryahooda ka barakacaan dagaal qabiil oo Hargis ka dhacay November 8, oo ka dambeeyey markkii labo maleeshiya qabiil ay isku qabsadeen waro iyo baraago ay biyo galeen roobka deyrta oo aan badneyn oo deegaanka ka da’ay, sida Raadiyo Ergo uu sheegay, gudoomiyaha maamulka degmada Balanballe, Xuseen Liiban Warsame.
Dadku waxay u kala barakaceen deegaannada Owlaale iyo Faa-cadde. Halka dadka ugu badan ay ka barakaceen, oo ay colaaddu ay sida weyn u saameysay ayaa ah deegaanka Hargis oo ay 230 qoys ka barakaceen.
Hinda Maxamed Maxamuud, waa xoolo dhaqato, hooyada qoys ka kooban 10 qof ayaa kamid ah dadkaasi, waxa ay barakac ku tahay deegaan miyi ah oo Hargis u jira 15 km. Qoyskeedu ma heli karaan raashin joogto ah, waxayna hadda ku nool yihiin raashin uu maamulka Balanballe soo gaarsiiyey.
“Xabbad bur ah oo la hogeeyay iyo tobanle biyo ah oo maamulka Balanballe uu bixinayay ayaa qoys ahaan nala siiyay saaka. Maxay qoys dhan xabbad bur ah u tari kartaa? waa waxba”.
Lix maalin ayey barakac ku tahay meesha ay joogto. Waxay sheegtay in xilli subax ah ay barakaceen markii colaaddu deegaankooda ka billaabatay. Carruurteeda uu uu u yar yahay toddoba jir ayey lugeysiineysay muddo saddex saacadood ah.
Waxay u sheegtay Raadiyo Ergo in 40 neef oo ari ah oo ay laheyd ay kaga soo carartay Hargis, haatanna aysan garaneyn halka ay joogaan iyo haddii ay wax ku dhaceenba.
Hinda ayaa tilmaantay in markii dagaalka billowday uu arigoodu ku kala firirsanaa goob ka durugsan hoygeeda, awoodna uma aysan laheyn in ay soo kaxeyso cabsi ay ka qabtay in xabbadda habowga ee kooxaha dagaallamayey ay waxyeello ka soo gaarto.
“Hoygayagii, xoolahayagii iyo deegaankaygii kuma laaban kanro, ciidamadii dagaallamay ee na soo qaxiyay ayaa ku sugan, halistaasna uma bareeri karno”.
Ma jiro wax gargaar ah oo qoysaska barakacay ay heleen, marka laga reebo raashin bisil iyo biyo, oo uu maamulka degmada Balanballe gaarsiiyey labo mar toddobaad gudihiisa.
Xidig Hure Aadan waa aabaha qoys 12 qof ah, duleedka deegaanka Hargis ayuu ku dhaqanayey tiro ari ah iyo baraag qaada afar booyadood oo biyo ah, taasoo xilli roobaadka kasta uu uga faa’iideysta, in qoyskiisu cabaan, qaarna ay iibsadaan.
Maalintii shanaad ayuu ku sugan yahay deegaanka Faa-cadde, oo qiyaastii Hargis u jirta 17km dhinaca koonfureed. 53 neef oo kamid ah tirada arigiisa ayuu kala barakacay Hargis, laakiin intii kale ayuu tilmaamay in ay ka lumeen intii ay xabbabdu socotay.
“Qofkeena noogu nasiibka fiican waa kan hela galaas biyo ah iyo wax uu afka gashado, waxaa jirta marmar aan biyaha iyo cuno aan badneyn aan ka helno dadka safarka ah ee halkan isticmaala”, ayuu yiri Xidig.
Halka ay deggeen oo ah waddada dhinaceeda, waxaa isticmaala gadiidka ka yimaada Balanballe ee kaga sii gudba dhanka tuulooyinka iyo xoolo dhaqato safar ku mara, kuwaasoo deeganno kale ka soo aroora, sida uu sheegay Xidig.
Waxaa uu carruurtiisa siiyaa caanaha arigiisa, oo qaar yar oo kamid ah ay caano aan badneyn leeyihiin, taasi oo haddii uusan heli laheyn xaalada ku sii xumeyn laheyd.
Guddoomiyaha Balanballe, ayaa sheegay in ay socoto waan-waan lagu joojinayo xiisadda ka jirta deegaanka colaaddu ka dhacay, taasoo ay garwadeen ka yihiin maamullada deegaanada gobolka Galgaduud iyo odayaasha dhaqanka.
Dhinaca kale, waxa uu sheegay in ay wadaan qorshe ay gargaar dheeraad ah ku gaarsiinayaa dadka barakacay.
