(ERGO) – Nasro Xaaji Maxamuud, waa hooyo dhashay shan carruur ah, waxay ka welwelsan tahay sidii ay isaga bixin lahayd lacag dhan $220 oo ku baxday daaweynta saddex carruurteeda ka tirsan oo jadeeco ay ku dhacday.
Muddo 15 maalmood ah ayay kula jirtaa xarun caafimaad oo ku taalla deegaanka Girijir oo 60 km koonfr-bari ka xiga degmada Matabaan ee gobolka Hiiraan.
Waxay Raadiyo Ergo taleefanka ugu sheegtay in carruurta ay ku soo qaadday gaari-dameer looga kireeyay $8. Waxay ka keentay tuulada Xagarrey oo 7 km waqooyi ka xigta deegaanka Girijir, oo leh xarunta caafimaad ee ugu dhow halka ay carruurta ka keentay Nasro.
Waxay tilmaantay in carruurta ay ku aragtay qandho joogto ah, matag, shuban iyo nabro ka soo baxay jirkooda, markaas ayay go’aansatay inay keento Girijir, waxayna dhakhaatiirtu u sheegeen in carruurteeda ay jadeeco hayso.
Cudurka jadeecada ayaa ka dillaacay miyiga afar tuulo ka tirsan Girijir dabayaaqadii bishii la soo dhaafay ee Sebtembar.
Sagaashan qof oo 76 ka tirsan ay carruur yihiin ayuu ku dahacay cudurka tan iyo markii uu dillaacay, waxaana hadda xarunta caafimaad ee ku taallo Girijir jiifa oo la daweynayaa 10 carruur ah oo ay ku jiraan carruurta Nasro.
Shan iyo toddobaatan kale oo Girijir wax looga qaban waayay ayaa loo gudbiyay degmooyinka Matabaan iyo Guriceel.
Saddex carruur ahaa ayaa u geeriyootay cudurka jadeecada, midkii u dambeeyayna wuxuu dhintay horraantii bishaan aan ku jirno ee Oktoobar.
Deegaanka Girijir ma laha isbitaal dadweyne iyo MCH toona, waxaana ku yaalla xarun caafimaad oo gaar loo leeyahay, taas oo dadka laga iibiyo dawooyinka.
Meelaha uu ka dillaacay cudurka ayuusan gaarin tallaalkii jadeecada ee u dambeeyay, waxaana tallaalka Girijir laga sameeyay muddo hadda sanad laga joogo, sida uu Raadiyo Ergo taleefanka ugu sheegay Dr. Cali Odawaa Cali oo ka mid ah dhakaatiirta xarunta caafimaad ee deegaankaas.
“Ceel-dhiinle iyo Xabale tallaal ayay heleen waxayna ka heleen hay’adda Relief iyo NGO-ga Wardi, laakiin tuulooyinka kale wax talaal ah ma helin sida Ceyshe, Madax-libaax iyo Cabaale. Saddexdaas tuulo waaye kuwa ugu badan ee cudurku uu ka jiro,” ayuu yiri dhakhtarku.
Wuxuu intaas ku daray in sababta cudurka u dillaacay waqtigaan ay qeyb ka tahay dadka deegaannadaas oo aan biyo nadiif ah helin xilligii xagaaga.
“Deegaanka aan joogno cudurka wuu ku yar yahay waxa uu aad ugu badan yahay tuuloyinka miyiga ah,” ayuu yiri Dr. Cali.
Bukaannada la keeno xaruntaan waxaa uu dhakhtarku sheegay inay siiyaan daawooyin qallajiyeyaal iyo faleebooyin.
Dadka ay jadeecada ku dhacday ee la keenay xaruntaas kuma jiraan dad laga keenay gudaha Girijir, waxaana laga keenaa miyiga tuulooyinka u dhow dheegaanaas, sida uu sheegay dhakhtarku.
Wuxuu kula taliyay dadka reer miyiga ah in carruurahooda ay geeyaan meelaha ay tallaal uga heli karaan xilliyada uu tallaalku socdo, marka qof ka mid ah qoyskooda ay ku arkaan calaamada jadeecadana inay sida ugu dhakhsaha badan u geeyaan xarun caafimaad
