(ERGO): Dagaal ciidamada dowladda federaalka ee Soomaaliya iyo Al-Shabaab maalmahan ku dhexmarayey deegaanka Basra, oo 15-km dhinaca waqooyi kaga beegan degmada Balcad ee gobolka Shabeellaha dhexe, ayaa ku khasbay in ay guryahooda ka barakacaan 600 oo qoys oo beeraley ah.
Qoysaskan ayaa tobankii maalmood ee u dambeeyey soo gaaray kaamka Nasteexo oo ku yaalla degmada Kaxda ee magaalada Muqdisho, sida uu Raadiyo Ergo xaqiijiyey guddoomiyaha degmadaas, Maxamed Ismaaciil. Qoysaskan ayaa la dejiyey guryo cooshado ka sameysan oo ku dhex-yaalla kaamka.
Xabiibo Cali Aadan waa hooyada shan carruur ah waxay iyada iyo qoyskeeda yimaadeen xerada Nasteexo 19-kii bishan. Dagaal ka dhacay Basra ayaa sababay in iyada iyo saddex carruurteeda ah ay u soo qaxaan Kamxda.
Labo wiil oo ay dhashay iyo aabahoodna uu midba meel gooni ah u baxsaday, markii uu dagaalku dhacay. Inkastoo aysan si cad u ogeyn meesha ay hadda ku sugan yihiin, haddana dad ay ehel yihiin oo ay xiriirtay ayaa u sheegay in ay joogaan deegaanka Sabiid oo degmada Afgooye u jira 10-km dhinaca koonfureed.
Xabiibo qoyskeedu waxay deegaanka ay ka soo barakaceen ee Basra ku lahaayeen beer, iyo dukaan ay ku iibin jirtay raashinka iyo khudaarta cagaaran.
Xerada ay qoysaskan soo degeen ma jiro wax gargaar ah oo laga bixiyo, ilaa haddana cid u gurmatay barakacayaashan cusub ma jirto marka laga reebo in dadkii xerada sii deganaa ay siiyeen qoysaskan guryo ay degaan oo qoyskiiba hal guri la siiyey.
Si ay carruurteeda ugu hesho nolol ayey Xabiiba markii ay timid kaamka Nasteexo waxay billowday shaqo dhar dhaqid ah – iyadoo subax subax xaafadaha kale ee magaalada ka raadiso cid ay dhar u dhaqdo, waxayna maalintii ay shaqeyso heshaa $5.
Maamulka degmada Kaxda ee gobolka Banaadir ee ay qoysaskan yimaadeen, ayaa sheegay in awoodooda keliya ay ku kooban tahay in qoysaska soo barakacay ay siiyaan guryo ay degaan, iyagoo la kaashanaya dadka kaamka Nasteexo ku nool.
“Xilligii ay dadkan goosan lahaayeen beeraha ay beerteen bishii April ee sanadkan ayey soo barakaceen. Dadku ma aheyn dad abaar ka soo barakacay ,waa dad colaadaha ka soo barakacay. Noloshooda aad bay u liidataa 100%. Guryaha ay heleen ma ahan ,wax kale oo u dheer ma jiraan”. Sidaas waxaa yiri guddoomiyaha degmada Maxamed Ismaaciil.
Caasho Cabdi Isaaq waa hooyada sagaal carruur ah oo aabbahood ku dhintay duqeyn ka dhacay deegaanka Basra billowgii bishan, waxaa ay timidka kaamka afar cisho ka hor.
Waxa ay sheegtay in iyada iyo carruurteeda ay u soo lugeynayeen kaamka ilaa saddex maalmood kaddib markii ay weysay fursad ay lacago ama raashin ku soo qaadato markii mar qura dagaal uu ka qarxay. Deegaanka ay ka soo lugeeyeen ee Basra wuxuu u jiraa Muqdisho ilaa 55 Km.
Waxay ku laheyd Basra dukaan alaabaha bakaasha lagu iibin jiray iyo beer lix hektar. Hal wakhti oo kamid ah saddexda wakhti ee wax la cuno ayey hadda carruurteedu helaan, waxaana ku caawiyo horjoogaha kaamka ay soo degtay.
Guddoomiyaha degmada Balcad Qaasim Cabdinuur Furdug oo isna la hadlay Raadiyo Ergo, ayaa sheegay in ay jiraan qoysas kale oo ka soo barakacay tuulooyin kale oo soo gaaray Balcad cabsi ay ka qabaan in ay waxyeello ka soo gaarto colaadda gobolka ka taagan.
Deegaanka Basra oo wali ay dagaalladu ka socdaan waxaa jira ilaa 50 qoysas oo ku haray, kuwaasoo sheegayo in ay dantu bidday in ay sii joogaan deegaankooda.
