Natiijada imtixaanka dugsiyada sare ee Puntland oo kaalimaha sare sanadkaan saddex gabdhood ka mid noqdeen

(ERGO) Maryan Siciid Maxamed oo 18 jir ah, waxay ka mid tahay gabdhaha 10 arday ee ugu sareeya ka galay natiijadii shalay la soo saaray, waxayna gashay kaalinta afraad.
Maryan waxay wax ka baranaysay Iskuulka Imamu-Nawawi ee Boosaso, iyadoo la hadlaysa Raadiyo Erg ayaa sheegtay in dadaalka ay ku soo baxday uu ahaa mid ay ka dambeeyeen qoyskeedu.
“Waalidkay markasta waxay raaci jireen nidaamka aan wax u akhristo iyo sida aan wax u baranayo, in kastoo aysan iskuulka imaan jirin, laakiin marka aan guriga joogo shaqada guriga ee inta badan gabdhaha loo diro imaysan diri jirin, waxayna I siinayeen dhiiri gelin” Ayey tiri Maryan
Qoyska Maryan wuxuu ka kooban yahay siddeed qof oo ay saddex gabdho yihiin, waxayna sheegtay in labadii gabdhood ee kale ay ka hareen waxbarashada markii ay dugsiga dhexe marayeen, kuwaasoo ka waaweynaa, iyagoo da’dii 18ka aan gaarinna la guursaday.
Cosob Ciise waa hooyada dhashay Maryan, waa 45 jir, waxay Raadiyo Ergo u sheegtay in waalidiintu ay inta badan gabdhaha waxbarashada sare ka reebaan, taasoo ay ugu wacan tahay dhaqan bulshada ka dhex jira oo ah in gabadha la leeyahay waxay u geleysaa reer kale, wixii dhaqale lagu bixiyana ay tahay wax la khasaariyey ama la door bido in nin lagu daro.
Salma Yusuf oo ka socotay Iskuulka Al-Najah iyo Maryan Cabdisalan oo iyana dhiganaysay dugsiga saree e Boosaso, ayaa galay kaalimaha sideedaad iyo sagaalaad.
Natiijada imtixaanaadka waxbarashada Puntland ayaa tilmaamaysa tirada gabdhaha dugsiga sare ka baxay ay aad uga hooseeyaan marka loo eego wiilasha, tirada ardayda u fariisatay imtixaanka sanadkaan ayaa ahayd 4,359 arday, 1,600 ka mid ah ayaa gabdho ah.
Agaasimaha imtixaanaadka ee wasaaradda waxbarashada Puntland Axmed Maxamuud  Warsame ayaa Raadiyaha Ergo u sheegay in dugsiyada hoose/dhexe ay tirada gabdhaha iyo wiilashu isu dhow yihiin, laakiin gabdhaha markay dugsiga sare soo gaaraan ay ka haraan waxbarashada, sababo uu ku sheegay iyagoo la guursado, qoyska oo shaqada guriga u dira iyo duruufo kale oo dhinaca dhaqaalaha ah oo qoysaska la soo derista, taasoo keenta in qoysku wiilasha waxbarashadooda xoogga saaraan.
Cosob Ciise oo ah hooyada Maryan ayaa sheegtay inay jirto dhaqan ah in gabadha wixii dhaqaale waxbarasho looga bixiyo ay la aadayso guri kale, aysana munaasib ahayn, taasina ay qayb weyn ka qaadato ka harista waxbarashada ee gabdhaha.
Natiijada waxbarashada dugsiyada sare ee Puntland waxay tilmaamaysaa in ardayda kaalimaha ugu saraysa gashay 13 ka mid ahi ay ka yimaadeen afar dugsi oo ku yaal Boosaaso, halka saddexda kalena ka yimaadeen dugsiyo ku yaal Garoowe iyo Gaalkacayo.
Wasiirka waxbarashada ayaa sheegay in sanadkii hore hal gabar ahi ku jirtay 10ka arday ee ugu sareeya, wuxuuna u sababeeyay guusha gabdhahan in ay ka dambayso dadaalkooda iyo fahamka qoysaska ee ahmiyadda waxbarashada gabdhaha oo soo wanaagsanaanaysa.
“Iskuulada sare qaarkood ayaa bilaabay fursado dhiiri geliya waxbarashada gabdhaha, sida inay ugu dhex diyaariyeen agabkii nadaafadda ee ay u baahnaayeen iyo goobo ay ku nastay markay xanuun dareemayaan”Ayuu yiri Axmed.
Wuxuu intaas ku daray in ay jiraan sidoo kale mashriic gabdhaha ka bixiya dharka ay qaataan. Wuxuuse sheegay gabdhuhu qayb ahaan wiilasha ayay la mid yihiin xaga tartanka sida wiilashu u dadaalayaan oo u tartamayaan baa gabdhuhuna u tartamay
Wasaaradda waxbarashaddu waxay tobanka kaalimood ee sare u raadisaa waxbarasho oo ku wajahan caafimaadka iyo Injineeriyadda siisaa ardayda kaalimaha hore ku soo baxa sanad walba, kuwaas oo dibedda loo diro.
Maryan ayaa sheegtay inay quud daraynayso inay barato culuunta takhtarnimada, gaar ahaan qaliinka neerfayaasha, maadaama aysan wadanka jirin.