Labo carruur ah oo da’doodu ahayd 2 sano jir iyo 4 jir ayaa toddobaadkii hore u geeriyooday cudurka jadeecada. 22 kale oo da’doodu u dhexeyso 1 ilaa 5 sano oo ay jadeeco hayso ayaa hadda lagu daweynayaa isbitaalka hooyada iyo dhallaanka ee Banaadir, sida uu Raadiyo Ergo u sheegay Dr Maxamed Cabdiraxmaan Cumar oo ah madaxa qaybta Jadeecada ee Isbitaal.
Wuxuu sheegay in cudurka jadeecada uu ku sii faafayo degmooyinka gobolka Banaadir, sababna ay u tahay faafista jadeecada qoysaska oo inta badan aanan ilmahooda ka tallaalin marka loo sheego inay talaalaana diida, waxaana uu tilmaamay in sanadkii hore oo ay qaabileen 120 kiis oo jadeeco ah, laakiin hadda ay u muuqdo mid tiradaas ka badan maadama toddoba bil oo sanadkaan ah isbitaalka la keenay 199 kiis oo jadeeco ah.
“2017-kii waxay u badnaayeen Xeryaha barakacayaasha, balse sanadkan waxay u badan yihiin kiisaska jadeecada degmooyinka Gobolka Banaadir, Inta badan dadkan badankood tallaalka jadeecada ma qabaan, waxaana laga kala keenayaa 17-ka degmo ee Gobolka banaadir oo ah meelaha uu ku sii fidayo cudurka,” ayuu yiri.
Dadka bukaannada kula jira isbitaalka waxaa ka mid ah Nadiifo Muxudiin Axmed oo ka timid degmada Hodan ee gobolka Banaadir, waa 26 jir hooyo u ah labo carruur ah. Waxay hadda isbitaalka ku haysaa gabadheeda oo 3 sano jir ah oo ay isbitaalka keentay Axaddi ay bishaan ahayd 22.
Waxay sheegtay in gabadha korkeeda ay ka soo baxeen nabro, sidoo kalena qandho daran ay ku aragtay, waxaa kale oo ay sheegtay inay ku aragtay dibnaha oo casaaday. Nadiifo carruurteeda horay umaysan tallaalin sababtana waxay ku sheegtay inay u haysatay in tallaalku yahay kan keena cudurrada ku dhaca carruurta.
“Gabadha waxaa iga dhacday jadeeco, qandho, sidoo kale mararka qaar matag iyo weliba nabaro ayaa ka soo baxay, markii hore inuu bahal ku kacay baan u moodey balse markii dambe ayaa la iigu sheegay in calamadahani ay jadecadu leedahay waxaana keenay cisbitalkan oo aan hada ku haayo, waxaana la tacaalaya maamulka cisbitaalka.”ayay tiri. Waxay tilmaamay in hadda ay soo roonaanayso gabadheeda oo qandhadii badnayn ka jabtay markii daawooyin la siiyay.
Bukaanada ay hayso jadeecada ayaa badankooda laga keenaa degmooyinka Hodan iyo Dharkeynley, sida uu Raayiyo Ergo u sheegay Dr Maxamed. Wuxuu tilmaamay in sababta ay degmooyinkaas ugu badan yihiin ay tahay iyadoo dadka ku nool ay sheegayaan inaysan carruurta qaadanin tallaalkii jadeecada.
Tallaalka ayaa la bixiyaa, hase ahaate weli waxaa muuqata wacyigelin la’aan la xiririta qaadashada tallaalka oo dadka qaar aysan ku baraarugsaneen inay carruurtooda geeyaan xarumaha caafimaadka si loo tallaalo.
Xafso Faarax Maxamuud oo deggan xaafada Kaawa Godey ee degmada Dharkenlay , waxa ay qayb ka tahay waalidiinta carruurta kula jirta cisbitaalka Banaadir , waxa jadeecu uga dhacday wiilkeeda oo labo sano jir ah , waxayna cisbitaalka soo gashay afar cisho ka hor.
Waxay sheegtay in carruruteeda oo waawayn ay dhammaantood talaashay, balse midkani aanay talaalin.
“Jadeeco ayaa wiilka iga dhacday, markaan keenayna dhaqaatiirtu waxay ii sheegeen inay ahayd in aan talaalo, horay carruurtayda waan u tallaalay balse midkaan anna waan mashquulay oo noloshaa ku maqnaaba raadinteeda, mana arkin kuwa wax talaala, balse hada alle ayaa mahadsan xaaladuna waa ay wacantahay oo waa la daawaynaya,” ayay tiri.
Xafso, oo carruurteeda keligeed korsata waxay dukaan bagaashka lagu iibiyo ku leedahay suuqa bakaaraha, halkaas oo inta badan maalinti ay ku maqan tahay si ay nololmaalmeedka qoyskeeda u daberto.
Sanadkii hore waxaa waxa ay saraakiisha cafimaadka ee isbitaalka Banaadir ayaa Raadiyo Ergo u sheegay inuu cudurka jadeecadu ku badnaa xeryaha lagu barakacay, sida uu sharxay Dr Maxamed Cabdiraxmaan
“Dadka ku nool gobollada Shabeelaha Hoose iyo Shabelaha Dhexe ayaa ugu badan tirada dadka labaddii todobaad ee u dambaysay aan qaabilnay , intooda badan waxay innoo sheegeen inay ka yimaadeen tuulooyinka labada gobol ee uu maro webiga guray ee Shabeelle kuwaas oo aan heli karin daryeel caafimaad iyo xarumo caafimaadba waxayna ahaayeen dad u nugul in cudurkasta uu soo wajaho” ayuu yiri.
Dhakhaatiirta caafimaadku waxay dadka ku nool degmooyinka gobolka Banaadir ku baraarujinayaan in carruurtooda ay tallaalaan, si ay uga badbaadaan cudurka halista ah ee jadeecada. Dhanka kale waalidiinta aan kula kulanay cisbitaalka Banaadir qaarkood waxay inoo sheegeen inaanay helin wax wacyigelin ah oo la xiriirta tallaalka, oo aysan arkin cid u imaatay una sheegtay muhiimada uu leeyahay tallaalka, Radio Ergo wuxuu la xiriiray qaybaha bixiya tallaalka ee wasaarada caafimaadka hase ahaate waxay ka gaabsadeen inay arintan ka warbixiyaan xilligan.
Munasar Mohamed Abdi / Raadiyo Ergo , Muqdisho
