(ERGO) – Cuna yari ayaa soo food saartay bukaannada ku jira xarunta dhimirka ee magaalada Baydhabo, kaddib markii 30-kii bishii Maarso uu go’ay raashin ay siin jireen hay’adaha Sado, Save the Children iyo Islamic Relief. Sidaas waxaa Raadiyo Ergo u sheegay agaasimaha xarunta Aadan Cabdiraxmaan.
Agaasimaha ayaa intaas ku daray in cuna yaraanta ay keentay in bukaanada xarunta ku jira ay hal waqti dawo qaataan halka markii hore ay saddex jeer ay ka heli jireen. Arrintaas oo uu sheegay in ay dheeraynayso waqtigii ay ku caafimaadi lahaayeen, isla markaana xarrunta uga bixi lahaayeen.
Xarunta oo la furay 2016-kii ayaa ah xarrunta keliya ee lagu daryeelo bukaannada qaba xanuunada dhimirka ee laga kala keeno gobollada Shabeellaha hoose, Baay iyo Bakool. Waxaa hadda ku jira 150 bukaan oo isugu jira rag, dumar iyo carruur.
Aadan Cabdiraxmaan ayaa sidoo kale xusay in xarunta ay yaalaan daawo ku filan bukaannada ku jira iyo waliba 78 qof oo maalin walba dawada dhimirka usoo doonta xarrunta.
Xarunta ka ayaa hadda ku tiirsan taakulayn uu ka helo qaar ka mid ah ehellada bukaanka xarrunta ku jira iyo waliba qurba joogta deegaanka. Hay’adihii horey gacanta ugu hayay ayaa xarunta siin jiray raashin isugu jira bur, bariis iyo saliid, sida uu mar kale Ergo u sheegay agaasimaha xarunta.
Bukaanada qaar ee xarrunta ku jira malahan ehelo wax u keenta, inkasta oo ay jiraan dad ehelladooda ka hela raashin si ay dawada u qaataan. Cabdullaahi Bashiir Maxamed oo walaal la ah wiil dhimirka ka xanuunsan oo xarrunta ku jira toddobo bilood iyo bar, ayaa sheegay in walaalkii uu u keeno cuno hal ama laba mar maalintii, isla markaana aanay daboolayn saddexdii waqti ee uu dawada qaadan lahaa, isaguna aanu awoodin in intaas ka badan uu u keeno.
Wuxuu sheegay in ay ahayd in bishii la soo dhaafay uu xarunta ka baxo, laakiinse markii uu waayay raashin iyo dawo ku filan uu wali u baahan yahay daryeel caafimaad oo dheeraad ah.
Halka waqti ee bukaannada xarunta ku jira ay helaan cunada ayaa ku timi dadaalo ay sameeyeen jaaliyada magaalada Baydhabo ee dalka Australia iyo ganacstada deegaanka si loo caawiyo dadka dhimirka la’ ee daryeelka u baahan. Halka daawadana ay ka helaan wasaaradda caafimaadka maamul goboleedka Koonfur-galbeed.
Wakiilka koonfurta Soomaaliya ee hay’adda Save the Children Maxamed Xaaji Aadan oo ahayd hay’addii ugu dambaysay oo muddo siddeed bilood ah gacanta ku haysay xarunta ayaa Ergo u sheegay in qorshihii ay ku caawinayeen uu dhammaaday, isla markaana aanay helin dhaqaale kale oo ay ku garab istaagaan.
Maamulka xarunta ayaa sheegay in ay baaq u direen hay’adaha gargaarka bixiya, dowlada Soomaaliya iyo ganacsatada deegaanka, laakiinse aanay weli helin ballan qaad ku aadan sidii xarrunta loo garab istaagi lahaa. Haddii xaaladda cuna yarida ah ay sidan ku sii socotona ayay tilmaameen in ay ka cabsi qabaan in xaruntu xiranto.
