(ERGO) – Dad gaaraya 317 qof oo ka mid ah qaxootiga Soomaaliyeed ee ku jira xeryaha Dhadhaab ee Waqooyi-bari Kenya, ayaa shalay dib ugu noqday gobolada Jubooyinka. Qof walba oo dadkan ka mid ah ayay hay’adda UNHCR siisay lacag dhan 200 oo doolar halka kuwa baahiyaha gaarka ah qabana la siiyay 230 doolar.
Dib-u-noqoshada qaxootiga oo ku timi rabitaankooda ayaa hakad ku jirtay tan iyo bishii afraad ee sanadkii lasoo dhaafay.
Qaxootiga hadda dib-u-laabanaya ayaa sii maraya dhulka iyaga oo ka raacaya Dhadhaab basas ay kharashkooda bixisay Qaramada Midoobay. Marka ay tagaan Dhooblay oo ku taalla xuduuda ay wadaagaan Kenya iyo Soomaaliya ayaa qof walba wuxuu kasii aadayaa halka uu deegaan ahaan ka soo jeedo.
Sida lagu sheegay warbixin ay soo saartay shalay hay’adda Amnesty International, dhammaadkii bishii Nofeember ee sanadkii lasoo dhaafay, ku dhowaad 5,400 oo ku nool xeryaha Dhadhaab ayaan diiwaan gashanayn. Qaar ka mid ah ayaa dib ugu noqday Soomaaliya, halka kuwa kalena ay ku soo laabteen xeryaha.
Amnesty oo soo xiganaysa hay’ad Kenya laga leeyahay oo kormeer ku samaysa isu-socodka xuduuda ay labada dal wadaagaan ayaa sheegtay in sanadkii lasoo dhaafay ee 2017 oo keliya, in ka badan 24,000 oo qof ay ka soo gudbeen xadka ay Kenya la wadaagto Soomaaliya. Dadkaas intooda badan waxay ka qaxeen amni-darro iyo abaaro.
Qaxootiga aan diiwaan-gashanayn ayaan fursad u helin adeegyada ay bixiyaan hay’aduhu; sida raashinka iyo daawada. Waxay gacan ka helaan dadka diiwaan-gashan ee xerada kula nool oo laftoodu aan helin gargaar ku filan. Barnaamijka cunnada adduunka ee WFP ayaa bishii Oktoobar ee sanadkii lasoo dhaafay dhimay raashinkii ay siin jireen qaxootiga.
Dadka aan diiwaan-gashanayn ayaa khatar ugu jira in la xiro ama dib loogu celiyo Soomaaliya. Bishii Janaayo ee lasoo dhaafay ayay Amnesty waxay sheegtay in 31 dhalinyaro Soomaali ah la xiray, kadib markii lagu eedeeyey in ay si sharci-darro ah ku joogaan Kenya.
