Iisho Xaaji Siidow oo 9 sano jir ah, xanuun daran ayaa haya. Lugaheeda aad ayay u bararan yihiin. Waa la dabray si uu socodkeeda u xaddidnaado. Laakiin hadda derin dhex taalla qol cooshad ka sameysan oo geed aanu u dhoweyn ayay ku jiiftaa. Halkan waa xerada lagu barakacay ee Beledul-Amiin oo ku taalla degmada Dayniile ee Muqdisho.
Toban maalin ayaa laga joogaa markii iyada iyo walaasheed oo lix jir ah loo guday fircooniga. Dhiig badan ayaa ka baxay sakiintii lagu jar-jaray awgeed, ilaa maalintaasna lama siin wax dawo ah. Gabadhan oo weriyaha Ergo uu booqday xaaladdaas ayaa u suuragelin waysay inay la hadasho. Laakiin hooyadeed oo lagu magacaabo Nuurto Jeelow Maxamed ayaa Raadiyo Ergo u sheegtay in iyada oo dhibaato ka soo martay gudniinka noocaan ah ay haddana u gudday gabdhaheeda, iyadoo u aragta inuu ilaalinayo sharaftooda.
Xerada Beledul-Amiin oo keliya sagaal gabdhood ayaa isku maalin la guday, taas oo ku tuseysa sida uu gudniinka fircooniga ugu badan yahay xeryaha lagu barakacay ee Muqdisho iyo hareeraheeda.
Gabdhahan daryeel caafimaad ma helaan. Biyo kulul oo cusbo leh ayaa looga dhaqaa dhaawaca. Hooyooyinkood waxay aaminsan yihiin haddii ay dawo siiyaan dhibbaneyaasha in aysan u bogsooneyn boogta. “Dawo waxaa ugu filan biyaha kulul,” ayay tiri Nuurto. Si howsha gudniinka ah loogu fuliyo waxaa gabadhiiba looga qaatay 15,000 oo shilin oo ka yar $1.
Nuurto waxay tilmaantay in gudniinka noocaan ah uu leeyahay saameyn waareysa oo ay dumarku la kulmaan. Xanuunka ugu daran waxay dareemaan xilliyada caadada iyo dhalmada. Laakiin waxay u arkaan caado aan laga tallaabsan karin oo gaashaan u ah gabdhaha.
Fircooniga waxaa loo gudaa gabdhaha ay da’dooda u dhaxeyso 5 ilaa 10 sano jir. Xarunta Horumarinta Haweenka Soomaaliyeed (SWDC) ayaa Raadiyo Ergo u sheegtay in sanadkan 2017 ay diiwaangelisay 500 oo kiis oo gudniinka fircooniga ah. Inkastoo aanay si buuxda u dhaqangelin haddana, dadaallada lagu hakinayo fircooniga waxaa ka mid ah sharci mamnuucaya gudniinka firnoociga ah oo ay soo saartay wasaaradda haweenka ee xukuumadda Soomaaliya.
Sacdiyo Maxamed Nuur oo ah agaasime-waaxeedka qeybta jinsiga ee wasaaradda ayaa Raadiyo Ergo u sheegtay in sharcigan oo sugaya ansixinta baarlamaanka haddii uu dhaqangalo uu ciqaabi doono, kuwa ku dhaqma gudniinkan.
