Labo carruur ah ayaa horraantii toddobaadkan cudurka shuban-biyoodka ugu geeriyootay tuulada Garsaal oo 35 km koonfur ka xigta degmada Ceelwaaq. Waxaa hadda isbitaalka Ceelwaaq cudurka u jiifa 27 qof oo 14 kamid ah yihiin dumar halka 12 kalena ay caruur yihiin.
Maamulaha isbitaalka Ceelwaaq Dr. Maxamuud Mukhtaar oo sidoo kale ah dhaqtar ayaa Raadiyo Ergo u sheegay in bukaannada laga keeno xeryaha lagu barakacay ee Ceelwaaq iyo deegaannada miyiga ah ee ku hareeraysan.
Dr. Maxamuud ayaa u sababeeyey faafitaanka shuban-biyoodka inuu yahay dadka oo cabaya biyo aan nadiif ahayn iyo carruurta nafaqo-darradu hayso ee ku nool xeryaha barakacayaasha.
Roobka dayrta ayaa horraantii bishii Noofember ka da’ay dhulka miyiga iyo tuulooyinka hoostaga Ceelwaaq, taas oo keentay in biyihii roobka ee dhulka taagga sare ka soo rogmaday oo wasaqeysan ay galaan ceelashii ay dadku ka cabayeen.
Faadumo Cabdi oo deggan miyiga tuulada Kurtun-dhooble oo Ceelwaaq dhanka bari ka xigta 87km ayaa caruurteeda oo 4 gabdhood iyo 2 wiil isugu jira, waxaa shuban-biyoodku kaga dhacay gabadha ugu yar oo 4 sano jir ah. Todobo maalmood muddo laga joogo ayay deegaankeeda ka raacday gaari dameer geeyey Ceelwaaq.
Qoyska Faadumo oo xoolo dhaqato ahaaa ayay abaartu ka dishay dhammaan xoolihii ay dhaqan jireen oo gaarayay 43 neef oo isugu jira ari iyo lo’. Radio Ergo ayay uga warrantay xaaladda gabadheeda oo shuban biyoodku kaga dhacay 14 maalmood kahor. Isbitaalka ayay hadda muddo 7 maalmood ah kula jirtaa. Xaaladda caafimaad ee gabadheeda ayaa soo hagaagaysa, kadib daryeel caafimaad oo ay u heshay.
Qoysaska ay deegaan wadaaga yihiin ayay sheegtay in 20 qof oo kamid ah uu shuban-biyoodku ku dhacay, dhammaantoodna loo qaaday Isbitaalka magaalada Ceelwaaq. Halkaas oo xaaladooda caafimaad lagula tacaalayo.
Abuukar Aadan oo deggan tuulada Garsaal, wuxuu isbitaalka Ceelwaaq mudo lix maalmood ah kula jira labo carruur ah oo uu dhalay kuwaas oo qaba cudurka shuban biyoodka. Wuxuu sheegay inuu isbitaalka ku keenay gaari dameer uu ku soo kiraystay $15. Cudurka ayaa carruurta kaga dhacay muddo hadda laga joogo toban maalmood. Wiil afar sano jir ah ayuu sheegay inuu xanuunku aad u hayo, halka gabar lix sano jir ah ay iyadu roon tahay.
Deegaankii uu ka yimi Abuukar ee Garsaal ayuu sheegay in cudurku uu kusii fidiyo, dadkuna aanay haysan adeegyadii caafimaad ee ay u baahnaayeen, taasina ay ku khasabtay inuu caruurtiisa keeno degmada Ceelwaaq.
