Siddeed qof oo ka tirsanaa dadkii ku dhaawacmay qaraxii Soobbe ayaa u dhintay markii loo waayay dhiig ay si degdeg ah ugu baahnaayeen. Keyd la’aanta dhiigga waa mid ka mid ah dhibaatooyinka ugu waaweyn ee ay eersadaan dadka xaaladda degdegga ah loo geeyo isbitaallada.
Qaraxa oo 14-kii bishan ka dhacay isgoyska Soobbe ayaa sababay dhimashada 358 qof iyo dhaawaca 228 qof sida uu 20-kii bisha warbaahinta u sheegay wasiirka warfaafinta ee xukuumadda Soomaaliya, Cabdiraxmaan Cumar Cismaan.
“Dhiig la’aantu waxay ahayd mid xaaladda sii murjineysay,” ayuu yiri Rooble Axmed Iidle oo ah qoraa si mutadawacnimo ah ula shaqeynayay kooxda gurmadka. Wuxuu Raadiyo Ergo u sheegay markii shan ka tirsan dadkaas ay ku dhinteen isbitaal Madiina in ay jireen afar qof oo kale oo xaaladdaas oo kale ku sugnaa oo dhiig loo raadinayay.
Agaasime ku-xigeenka isbitaal Muqdisho City ayaa Raadiyo Ergo u sheegay in isbitaalkooda oo ay dhiig loo waayay ugu geeriyoodeen saddex qof, si ay u badbaadiyaan 12 kalena oo halis ugu jiray inay dhiig la’aanta u dhintaanna ay toddobo ka tirsan shaqaalahooda ku khasbanaadeen inay dhiiggooda u shubaan. Dad gaaraya 41 qof oo qaraxaas ku soo dhaawacmay ayaa la seexiyay isbitaalkaas.
Dadka lagu badbaadiyay dhiigga shaqaalaha laga shubay waxaa ka mid ah Cabdifataax Saciid Maxamed oo 22 jir ah. Isaga oo bajaaj ku kaxeynayay isgoyska Soobbe ayuu qaraxu haleelay, lugta midig, dhabarka iyo madaxa ayuu dhaawac xooggan ka soo gaaray. Muddo labo saacadood ah ayaa dhiig loo raadinayay si loogu sameeyo qalliin uu u baahnaa.
“Ma jirin dhiig noo diyaarsanaa. Xaaladdu ma aheyn mid aan fileynay, waxay aheyd dhibaato culus oo na soo wajahday, Dadka qaar markii nala soo gaarsiinayay HB-gooda wuxuu ahaa 3 iyo wax ka yar sida ay u soo dhiig baxayeen darteed,” ayuu yiri agaasimaha.
Waxaa Muqdisho ka shaqeeya urur dhallinyaro oo si mutadawacnimo ah u wacyigeliya isla markaana diiwaangeliya dadka dhiiggooda ku deeqaya, kaddibna isku xira isbitaallada dhiigga looga baahan yahay iyo dadka dhiiggooda ku tabarucaya.
Cadnaan Cabdullaahi Xuseen oo xubin ka ah ururka Somali Blood Donation ayaa Raadiyo Ergo u sheegay in inkastoo aysan tirakoob sax ah haynin, ay haddana og yihiin in ay jiraan dad ku dhintay isbitaallada iyo xitaa gudaha gaadiidka gurmadka degdegga ah.
Bankiga dhiigga ee Muqdisho wuxuu xiran yahay muddo 27 sano ah. Xaruntiisa waxaa hadda ay hoy u tahay dad soo barakacay. Isbitaallada iyo xarumaha caafimaadka ee magaaladana ma haystaan keyd loo baxsado xilliyada xaaladaha degdegga ah.
