Muddo ka badan hal sano oo ay xirnayd wadadda isku xirta degmooyinka Xudur iyo Ceelberde oo ka tirsan gobolka Bakool ayaa hadda lagu guulaystay in dib loo furo, labadaan magaalo oo isu jira 90 km ayaa waxay muhiim u tahay isu socodka badeecooyinka ganacsi, iyadoona qiimihii raashinka ee degmadda Xudur uu hoos ugu dhacay kala bar intuu bil ka hor ahaa, bulshada degmadaan ku nool oo ay haysteen dhibaatooyin cunto yaraani ayaana hadda sheegaya in maalmihii ay furnayd wadadu isbedel ku yimid noloshoodii.
Faadumo Cabdiraxmaan Maxamed waxay ka mid tahay gacnasatadda Xudur ayaa Ergo u sheegtay
“ Walaal is badel badan ayaa ku yimid qiimaha rashiinka suuqyada, waayo wadada Ceel-barde iyo Xudur ayaa la furey gadiidka ayaa soo galaya magaalada mar kasta oo badeecadaha wada, qiimaha raashinkana hoos ayuu u dhacay, tusaale markii hore haween dhabarkooda rashiin dhuumaleysi ay ku keeneen ayaan suuqyada ku iibin jirney oo kiiladii sonkor ah 40 kun oo ayaa iibin jirney burka iyo bariiskana sidoo kale laakin hada waxaan iibinaynaa 20-kun oo shilin waayo gadiidki ganacsiga ayaa imaanaya magaalada”
Casho Axmed Xasan waa 75 sano jir haysatana 9 caruur ah, iyada oo ku sugan degmada Xudur ayey Ergo uga warantay siday nolosheedu isu bedeshay intii go’doonku dhamaaday.
“Xudur ayaan joogaa, mudo go,adoon ayaan ku jirney, laakin hadda hal wado ayaa noo furantay rashiinki ayaa soo galaya, qof kasta wixii uu heysto ayuu wax ku iibsadaa, laakin markii hore ma jirin, mararka qaar waxaa dhici jirtey in la waayo rashiin la iibsado, hadda wax kasta waa diyaar qiimahana waa iibsan karnaa ,carruurtey xaalkooda waa la wal wali jirey ilaahay ayaa ii bad baadiyey laakin hadda qiimo dhimis ayaa la sameeyay”.
Xuseen Cabdi Maxamuud oo ka mid ah odayaasha magaladda Xudur ayaa Ergo u sheegay in muddo hal sano ka badan dadka magaladdu ku jireen go’doon dhinac kasta ah, oo dad ay ugu dhinteen macaluul, haddase ay arrintani noqonayso nefis dedku heleen, ayna wadadaani tahay tan keliya ee sahashay in sahaydu soo gasho.
Xudur ayaa ka mid ah magaalooyin dhowr ah oo go’doonsanaa mudo sanad ah kuna yaala goboladda koonfur galbeede ee Bay, Bakool iyo Gedo, ayna dadka ku adkayd inay heleen quutal daruuriga, maamulka gobolka Bakool ayaana ku guulaystay furista wadadaan dhamaadka bishii Janaayo ee ina dhaaftay, wadadaan ayaana ah meesha keliya ee badeecadu u soo marto degmada, iyadoo weli ay go’doonsan yihiin degmooyinka Qansaxdheere oo bay ah, degmadda Waajid iyo Tiyeeglow oo Bakool ah, iyo Buurdhuub oo Gedo ah.
