Sare u kac aad u xooggan ayaa laga dareemayaa suuqyada iyo goobaha ganacsiga degmada Buurdhuubo ee gobolka Gedo,iyadoo arrimahaasina ay saameyn ku yeesheen nolosha dadka ku dhaqan degmadaasi oo u badan qoysas danyar ah oo ay horey u ragaadiyeen abaaro iyo colaado soo noqnoqdey.
Sarakacaasi ayaa lala xariirinayaa hakad ku yimid gaadiidkii xamuulka ahaa ee soo galayey degmadaasi, dagaallo ka dhacay Buurdhuubo awgeed, waddooyinka oo ku xirmey colaadaha iyo weliba degganaansho la’aanta ka jirta degmadaasi, arrimahaasi oo is biirsadey ayaa waxay keeneen in qiimaha raashiinka uu sare u kaco.
Noocyada raashiinka uu qiimahooda cirka isku shareeray ayaa waxaa ka mid ah masaggada,bariiska, burka, sokorta, saliidda iyo baastada, kuwaasoo ah cunnada daruuriga u ah dadka, iyadoo shey weliba uu ka sare marey labalaab qiimihii lix bil ka hor uu ka taagnaa degmadaasi.
Cabdullaahi Ciise oo ka mid ah waxgaradka degmada Buurdhuubo oo u warramayay Ergo ayaa sheegay in raashiinkiiba uu gabaabsi ka yahay degmada, oo haddii ay sidaan kusii socoto wax raashiin ah aan laga heli doonin degmada, taasna ay sababi doonto in dadku ay barakacaan.
Fadumo Aadan Axmed oo ah hooyo ku nool degmada Buurdhuubo ayaa sheegtay in raahsiinka hadda laga isticmaalo degmada si qarsoodi ah gaari dameerro looga keeno degmada Luuq oo Buurdhuubo u jirta 120km.
Waxay sheegtay in kiisha burka ah uu marayo $56, loorka bariiska ahna $80, sokorta $60 jirgaankii saliiddana ay tahay $50, taasoo labalaab ka badan qiimihii ay sanad kahor marayeen.
Axmed Cumar Saalixi/FM
