Beeralleyda waraabka ee degmada Luuq ee gobolka Gedo ayaan sanadkan goosan doonin dalag wanaagsan, iyadoo dalagyadooda ay saameyn ba`an ku yeesheen cayayaanka gala beeraha.
Beeralleydan oo ku dhaqan tuulooyinka Haanooy, Maganeey, Banmudul, Xero kowaad, Caracase iyo kuwa kale oo hoos taga degmada Luuq ee gobolka Gedo, noloshooduna ay ku tiirsan tahay wax soo saarka beeraha ayaa niyad-jab ka muujiyay tacabkooda iyo khasaarada qabsatay.
Maxamed Muxumed oo ka mid ah beeralleyda tuulada Haanooy oo Luuq u jirta 8km ayaa u sheegay Ergo in wax soo saarka sanadkan uu aad hoos ugu dhacay, kadib markii dalagyada ay haleeleen cudurro ay ka mid yihiin: Malabsatada, kabajaanka, waariyow, fuuqsatada, diiratada iyo tixiriga.
“Dalagyada galleyda, basasha, digirta, sisinta, liinta iyo qudaar kala geddisan ayaanu beerannaa, waxaana u iib-geynaa magaalooyinka Muqdisho, Baydhabo, Baladxaawo,magaalada xadka ku taalla ee Mandhera, Garbahaartey iyo Xudur, iyadoo liintana oo si weyn looga beero deegaankana loo iib geeyo dalka Imaaraadka Carabta, laakiin sanadkan wax suuq ah malaha, sababtoo ah wax badan maba inoo soo go`in,” ayuu yiri Maxamed.
Cali Xuseen oo ka mid ah beeralleyda tuulada Maganey oo Luuq u jirta ilaa 11km ayaa isagana Ergo u sheegay in cayaanka qaarkood ay keenaan in beertu ay qallasho, halka qaarna ay galaan abuurka oo uu sidaasi ku baaba`o. Wuxuu sheegay inay yihiin dad reer miyi ah oo aysan aqoon badan u lahayn habka loola tacaalo cayayaankaas.
“Aniga beerteyda basasha ku beeran 30% way khasaartay. Kleigeyna maaha waa wax deegaanka oo dhan wada saameeyay.”
Wuxuu intaas ku darey in haddii beeralleyda ay heli lahaayeen qalab iyo dawooyin ay soo saari karaan dalag tayo fiican leh.
Cabdulaahi Sheekh Cali oo ka mid ah guddiga beeralleyda Luuq ayaa sheegay in beeralleydu ay u baahan yihiin daawooyinka cayayaanka iyo tababar ku saabsan sida looga hortago.
Axmed Cumar Saalixi/FM
