Beeraleyda roobka wax ku beerta degmooyinka gobolka Gedo ayaa sheegaya in midhaha u soo go’ay xilligaan ayaad uga yar yihiin kuwii ay heli jireen sanadihii tegey, tanoo ay u sababeeyeen colaado iyo xilli robaadkii dayrta oo aan si hagaagsan uga di’in gobolka.
Ismaaciil Cumar oo ka mid ah Beeraleyda tuulada Serinley oo 4 Km u jirta Magaalada Baardheere ayaa Ergo u sheegay.
“Rajada waa mid xun, waayo xilligii aan beeraha ka xoogsan jiray ayaa colaada deegaanka ka jireen, marka waxaan qabnaa walwal ah in abaari na gasho, waayo beertan aan u jeedo markii hore waxaa ka soo go,i jirey 400 ilaa 500 oo jawaan oo haruur ah, haatana waxaa ka soo go, ay 10 jawaan oo keliya, dhibkaana waa mid ay nala qabaan dhamaan dadka beeraleyda ah ee ku dhaqan degmooyinka gobolka Gedo, isagoona intaas ku daray in roobabkii dayrta laftigoodu ku yaraayeen gobolka ayna qayb ka tahay hoosu dhaca.
Abuukar Axmed oo ka mid ah Beeraleyda tuulada Tubaako oo 12 Km u jirta degmada Baardheere ayaa sheegay Beeralleyda in sanadkan ay beereen dalagyo kale gedisa sida masagada, gelleyda, digirta iyo sisinta in sanadkan roobabkii deyrta aysan daboolin dalagii la filayey in la goosto.
Dadka deegaanka Baardheere ay aa sheegaya in qiimaha mesegada ay aad kor ugu kacay, taninna ay ka danbayso beeraha oo aysan ka soo go’in raashin, iyadoo bishii Diseembar 50 kiilo ee mesegadda ahaa la kala siisanayey 150 kun oo shillin somali ah, halka uu hadda suuqyadda ka marayo 300 oo kun oo shillin.
Sidoo kale Cumar Maxamed oo ka mid ah beeraleyda degmada Buurdhuubo ayaa qaba sababaha loo aaneynayo hoos u dhaca ku yimid wax soosaarkii Beeraha in ay ugu weyn tahay colaadaha iyo taageerooyinki dhinaca beerashada ee laga heli jirey hay,adaha samafalka oo muddo 4 sano ah meesha ka maqan, arrimahaasi oo is biirsadey ayuu sheegay in ay tahay caqabadaha soo wajahay beeraleyda.
Gobolka Gedo ayaa ka mid ah gobollada koofurta dalka ku yaalla ee ay sida ba`an u saameeyeen abaarihii sanadkii 2011kii ku dhuftay qeybo ka mid ah dalka, waxaana bulshada gobolku ay u badan yihiin beeralley iyo xoolalley, iyadoo roobkii xilli dayrtuna ku yaraa, ayaa waxaa gobolka meelo badan oo ka mid ah ka jira colaado barakiciyey dadkii beeralayda ahaa.
