Guriceel oo ka tirsan gobolka Galgaduud ee bartamaha Soomaaliya ayaa dadkii deganaa waxay uga qaxeen dagaalo 2 todobaad ee ugu danbaysay ka socday, kuwaasoo u dhexeeya ciidamo kala taageersan dawladda federaalka Soomaaliya iyo ururka Ahlusuna waljameeca.
Tuulada Xasan tikaato oo qiyaasii 15km ka xigta Guriceel dhanka galbeed waxay ka mid tahay tuulooyinka ay dadku u qaxeen dad ka badan 220 qoys oo halkaas gaaray ayaa waxaa hadda haysta biyo la’aan.
Maxamed Salaad, oo ka mid ah dadka ka soo barakacay Guriceel kuna sugan tuuladaan Xasan Tikaato ayaa Ergo u sheegay “Waxaan ku suganahay ilaa 15 maalmood, 20 qoys ayaan ahayn horay, dagaladdii doraad iyo tii ka horaysay socdayse waxaa ku soo biiray 200 oo qoys oo kale, dhibaatadda ugu daran ee hadda ka jirta deegaanka ayaa ah, biyo la’aan, tuuladan ayaa biyaha ka hesha biyaha berkedaha ee xilli roobaadka , waxaana hadda lagu jiraa xilli jilaal ah oo kulul berkaduhuna aysan biyo badan lahayn.”
Dahabo Faarax Sheikh oo haysata 7 carruur ah ayaa iyana ka soo carartay Guraceel ayaa sheegtay in dhibaatada biyo la’aaneed tahay dhibaatadda ugu daran ee jirta hadda, “Annagoo maanta haraad la dhiman rabna aya booyad biyo ah waxaa noo keentay shirkadda Hormuud, runtiina meel aan ku sii negaan karno ma ahan dadka dagalamaya waxaan ka baryeynaa inay xabadda naga daayaan si aan gurayaheenna ugu noqono, oo carruurta uusan haraad naga layn.”
Xalimo Kulan oo ah hooyo waayeel ah ayaa sheegtay in dadku daadsan yihiin geedaha hoostooda, aysanna haysan hoy, ilaa haddana ay jiraan haween ku umulay dhirta hoostooda mana jiraan meel ay ka helaan wax daawo ah.
Waxay kaloo dadku u qaxeen tuulooyinka ay ka midka yihiin Ceelbaraf, Daahir site, Fooley, Sallax Dhadhaab oo ka tirsan Guriceel ilaa degmadda Matabaan oo gobolka Hiiraan ah. Dadka tuuladaan Xasan Tikaato u qaxay ayaa sidoo kale sheeganaya in nadaafad darro ka jirto goobtaas iyadoo cudurada maqaanku ku dhaceen carruurta.
Dadka barakacay ayaa dalbanaya in xal laga gaaro dagaaladda si ay guryahooda ugu noqdaan, welise ay ciidamadii isku hor fadhiyaan gudamaha magaladda inkastoo ay jirto 26 February 2015 la soo jeediyey xabad joojin, xabad joojintaan oo ay soo qaban qaabiyeen guddi ganacsato ah iyo odayaasha gobolku.
