Nidaam ay iskaashatada kawaanleyda Sahan ee magaalada Kismaayo iyo maamulka gobolka ay isku raaceen oo ku saabsan in tiro cayiman oo xoolo ah lagu qalo magaalada, kawaannada magaaladana maalinba mid lagu qalo hilibka si tooko ah, si loo ilaaliyo nadaafadda loona ogaado xoolaha la keenayo suuqa caafimaadkooda iyo inaysan ahayn xoolo lasoo dhacay ayaa saameyn ku yeelatay dadka reer miyiga ah ee xoolaha keensanaya sayladda magaalada Kismaayo.
Reer miyiga ayaa sheegaya in arrintaas ay yareysay tirada xoolaha lagu qalo magaalada, ayna keeneyso inaan xoolo badan la iibsan.
Macallin Mooge oo laba neef oo geel ah ka keensaday tuulada Qalaalnqal oo Kismaayo u jirta 60km, suuq xumada jirta darteed ayuu xoolihiisa looga qaatay deyn, haddana muddo saddex cisho ah ayuu joogaa Kismaayo oo uu sugayaa inuu helo lacagta looga qaatay oo gaareysa 23 milyan oo shilinka Soomaaliga ah.
Kulane Yuusuf oo ka mid ah dillaaliinta magaalada Kismaayo ayaa u sababeynaya suuqxumada jirta in kawaanleydii iibsan jirtay xoolaha badan ay yareeyeen tirada, sidoo kalena xoolaha ay ka xushaan kuwa cayilan ee caafimaadka qaba, sidoo kalena meeshii markii hore 96 miis lagu qali jiray hilibka haatan lagu qalo 30 miis oo keliya.
Muxumad Cali Dhegey oo isagana ah ganacsade kale oo xoolaha ah gaar ahaan dhanka ariga, kana keena tuulooyinka gobolka ayaa sheegay in qiimaha uu isagu ariga kusoo iibsaday mid ka yar ay uga qaataan kawaanleyda mararka qaarna deen looga qaato oo helidda lacagta ay waqti dheer ku qaadato.
Iskaashatada kawaanleyda Sahan ayaa dhnakooda sheegaya in nidaamkan uu faa`iido weyn u leeyahay bulshada, “Geela lasoo dhacay ayaa la keeni jiray suuqa, sidoo kalena kuwo cudur qaba ayaa la keeni jiray taaoso bulshada dhib ku ah, haddase waan joojinnay waxaasoo dhan.”Sidaa waxaa Ergo u sheegay Cabdi Colaad Cismaan oo ah guddoomiye ku xigeenka iskaashatada Sahan.
Sayladda magaalada Kismaayo muddo ku dhowaad laba bilood kahor waxaa la keeni jiray ilaa 1000 neef oo Ari iyo Geel isugu jira, balse maalmahan dambe waxaa la keenaa in ka yar 30 neef.
Maxamed Sahal Cumar/FM
