Hawl wadeennada waxbarashada ee degmadda Cadaado ee gobolka Galgaduud ayaa sheegaya in ardayda uga tegeysa waxbarashada dhibaato ka haysata aragga ay sii kordhayso.
Macallin Xasan Maxamed Geeddi oo ah maamulaha dugsiga hoose dhexe ee Imaamu Maalik ee magaalada Cadaado oo ayaa Ergo u sheegay in ardayda dhigata iskuulkooda lagu arkay 15 carruur ah oo qaba xanuunka aragga liita ilaa 5 ku dhawaadna ay ka hareen waxbashada halka wali qaar kale ay dhigtaan, asagoo intaa ku daray in qiyaas ahaan Ximan iyo Xeeb 20% ardayda ay qabaan xanuunkan.
Iqro Xuseen Maxamed oo ah 18-jir waxay ahayd gabadha kaliya ee qoyskaas Iskuul ka aadda marka wiilasha laga soo tago waxayna ka mid tahay ardayda Iskuulka uga tagay araggooda oo liita, 2-sano ka hor iyadoo maraysa fasalka1-aad ee dugsiga sare, haddana waa guri joog. Xuseen Maxamed oo ah aabbaha dhalay Iqro ayaa Ergo u sheegay in gabadhiisa goobo caafimaad uu geeyay haddana indhaheeda aysan wax isbaddal ah ku imaan.
Shaafici Shariif Daahir oo 16-sano jir ah, dhigtana fasalka 2-aad ee dugsiga sare wuxuu ka mid yahay ardayda araggoodu uu liito walina waxbarashada kama tagin, waxaan isku dayaa in aan xifdiyo casharrada badankooda si aan ugu kabo araggayga liita oo aan imtxaanka u baaso, mararka qaar waxba ma arko laakiin aradayda ayaan ka qaataa buugaagta oo aan la aadaa guriga si aan u guuriyo casharrada, waan sii wadayaa waxbarashada.
Macallin Xasan Maxamed Geeddi ayaa sheegay in bulshadu aysan ku baraarugsanayn dhibaatooyinka aragga liita u ku hayo ardayda, wuxuuna sheegay in sanadihii dambe ay aad u soo badanayeen carruurta ka cabanaya aragga liita ee aan arki karin sabuuuradda, waaliddiinta waa inay la socdaan arrintaan ayuuna yiri.
Maxamed Cabdi Diirshe/FO
