Ku dhowaad 250 qoys oo ka soo cararay dagaallo dhawaan ka dhacay tuulada Saax-dheer ee gobolka Sool ayaa sheegaya inay haystaan xaalado nololeed oo liidata sida hoy la’aan, caafimaad xumo iyo cunto la’aan
Inta badan dadkaas barakacay ayaa ku sugan deegaannada kala ah Xayuuke iyo Togga oo ah dhul hawd ah oo Saax-dheer u jira 40km una dhexeeya gobollada Mudug iyo Sool.
“Waxaan ka soo lugeeyey tuulada Saax-dheer markii ay ka dhaceen dagaallada waxaan wataa 9 carruur ah, ma haysanno cunno iyo hoy dhirta hoosteedaan joognaa, oo noolashu waa mid nagu adag , Saax-dheer waxaan ku haysannay meherad aan kala soo baxno nolala maalmeedka laakiin haddawaxba ma haysanno.” sidaa waxaa Ergo u sheegtay, Cibaado Axmed Maxamed.
Hooyo Caasho waxay haystaa 5 carruur ah oo ay la soo carartay, waxaan hadda noogu daran waa harraad, gaajo iyo cabsi ah in carruurtu naga lumaan halkaan aan hadda joogno waa hawd biyo la’aan ah oo cunnadana way nagu yartahay ayey tiri.
Sidoo kale Luul Axmed Faarax ayaa radiyaha Ergo ku tidhi “Waxaan wataa 10 carruur ah waxaa hoy noo ah gadiifado aan maalinkii dhirta saaranno habeenkii na dhaxanta aan ka galno, waxaa noogu daran waa biyaha, xaalada dhulku waa abaar gargaar ayaan u baahannahay gaar ahaan cunno iyo biyo.
Tuulada Saax-dheer ayaa 75 KM u jirta magaalada Laascaanood ee xarunta gobolka Sool waxaa dhawaan dagaal ku dhexmaray ciidamo kala socday maamullada Soomaaliland iyo Khaatumo,kuwaasoo sababay inay barakacaan dad rayid ah.
Qoysaskaan ayaa sheegay in wax ugu muhiimsan ay u baahana yihiin ay tahay gargaar deg deg ah iyo inay ku noqdaan guryahoodi.
Cabdiraxman Maxamed/FO
