Cabdi Cabdullaahi Cabdulle oo haatan ku sugan magaalada Beledweyne, wuxuu kasoo barakacay degmada Buuloburte ee gobolka Hiiraan oo ay ka jirto xaalad cunno yaraan aad u daran, iyadoo waddooyinka degmada soo galana ay xiran yihiin, Cabdi waxaa gaajo uga geeriyooday laba carruur ah oo uu dhalay, arrintaas ayuuna Ergo uga warramay.
Cabdi: Waxaan kasoo barakacay magaalada Buuloburte oo 115km u jirta magaaladan Beledweyne, lug ayaan ku imid halkan aniga iyo saddex carruur ah oo aan dhalay, markaan Buuloburte joogay waxaa iga dhimatay laba carruur ah oo mataano ah, isla markaana sanad jir ahaa.
Ergo: Labada carruur ah maxay u dhinteen?
Cabdi: Gaajo ayay u dhinteen, magaalada ayaad aadeysaa, waad soo laabaneysaa adigoon waxba wadin, wax raashiin ah oo magaalada yaalla malaha, shaqadaan ka shaqeyn jirayna way joogsatay, biyo oo keliya ayaa ilmaha la siin jiray, marka biyana kuma noolaan karaan.
Ergo: Maxaad ka shaqeyn jirtay?
Cabdi: Dhagax-jebin ayaan ka shaqeyn jiray, wayse joogsatay sababtoo ahdad iibsanaya malaha oo gawaari dhagaxaanta qaadda oo magaalada soo gasha malaha, marka aniga carruurta inta socon karta ayaan soo kaxaystay.
Ergo: Ma carruur kale ayaad kasoo tagtay?
Cabdi: Haa, shan gabdhood iyo hal iyo wiil iyo hooyadood, iyagoo ay gaajo hayso oo aan socon karin baan kasoo tegay, si aan u badbaadiyo inta socon karta.
Ergo: Buuloburte aad bay uga fogtahay Beledweyne, sidee adiga iyo carruurta saddexda ah aad kusoo gaarteen halkan, xaggeed cunto uga heleysay carruurta?
Cabdi: Intaan waddada soo soconnay waxaan kolba tuugsanayay dadka naga roon, iyagana waxay haystaan way na siinayeen, markaan Beledweyne wax yar usoo jirno ayuu gaari dhexda naga soo qaaday.
Ergo: Meeqo maalmood ayaad soo lugeyneysay?
Cabdi: Saddex maalin iyo saddex habeen oo xiriir ah ayaan soo lugeynayay.
Ergo: Hadda noloshaada ka warran?
Cabdi: Hadda dadka unbaa wax na siiya, ugu yaraan wax aan cunno waan helnaa hadda.
Ergo: Ka warran carruurtaad uga soo tagtay Buuloburte, maka warqabtaa?
Cabdi: Way iska dhibaateysan yihiin, $20 oo wiil uu i siiyay ayaan u diray, laakiin waxba umaba goyneyso haddey wax ku iibsadaan xitaa.
Ergo: Ma jireen dad kale oo ka qaxay magaalada?
Cabdi: Haa, haddaan qiyaaso ilaa 3,000 oo qof ayaa ka baxay Buuloburte, dadka qaar ayaa ilaa Muqdisho aaday, kuwaa sideydoo kale Beledweyne usoo lugeeyay, qofkii socon kara wuu soo baxayay.
Waxaa wareystay Maxamed Cusmaan Makaraan/FM
