Shirkadaan oo lagu magacaabo shirkada biyo gelinta magaalada Kismaayo ayaa waxaa ay xaafadaha kala duwan ee magaalada ka fulin doonta mashruuc biyo gelin ah gaar ahaana biyaha nadiifta ah ee ay dadku istcmaalaan, waxaan shirkadaan magaalada ka hirgeliyay ganacsato Soomaaliyeed oo isu tagay,Magaalada Kismaayo wixii ka dambeeyay bur burkii dowladdii dhexe ee Soomaaliya waxaa ka taagnaa dhibaatooyin dadka heystay dhanka helitaanka biyaha nadiifta ah, ayadoo xaafado badan oo ka tirsan magaalada ay dadku istcimaalaan biyo dhanaan ah oo aan caafimaad ahaan wanaagsaneyn, xilliyo bandanna sabab u ahaa inuu shuban dilaaco.
Shaafi Raabi Kaahin waa guddoomiyaha ganacsatada Soomaaliyeed ee ku shirkoobay mashruucaan biyo gelinta ah ee laga hirgelinaayo magaalada Kismaayo, wuxuuna isagoo raadiyo Ergo la hadlay uu faah faahin ka bixiyay ujeedada ay u aas aaseen shirkada biyaha ee Kismaayo “Runtii muddo dheer baan ku fekeraynay, waxaana muhiimaddeenu ahayd in 22kii sano ee la soo dhaafay aysan haysan dadka deegaankani biyo la cabo oo nadiif ah, biyaha la cabana waa kuwo maraakiib lagu keeno, waxaana dhib nagu haysay dhulkaan oo biyo badan leh, webiyo maraan in haddana aan biyo soo dhoofsano, waxaana farxad noo ah in mashruucaan ay dadka magaladu ka faa’iidaystaan inay helaan biyo nadiif ah, annagoo og guryo badan in looga guuray biyo la’aan, iyo dhinaca wanaajinta saxadda oo ah qayb muhiim u ah nolosha”
Xildhibaan Cabdirashiid Maxamed Xiddig oo ka qeyb galay munaasabaddii furitaanka masharuuca beyo gelinta Kismayo ayaa shegay in hirgelinta mashruucani uu ku soo aaday xilli baahi badan oo dhanka biyaha ah ay ka jirtay magaalada Kismaayo iyo nawaaxigeeda “Waxaan qirayaa in mashruucaan uu wax u soo kordhin karo magalada, wakhtigii dawladda biyaha magaladu Goobweyn ayey ka imaan jireen, markii hanaankaasi burburayna qof kasta ceel ayuu gurigiisa ka qotay, tanoo aysan lahayn hab ay ku kala soocmi karaan bulaacadaha oo iyana guryaha hoostooda laga qodo, waana sababtaas waxyaabaha cudurka daacuunka muddadii burburka magalada Kismaayo aadka uga jira”
Qaar ka mid ah dadweynaha ku nool magaalada Kismaayo oo iyaguna ka hadlay dareenkooda ku aadan mashruucaan biyo gelinta Kismaayo ayaa soo dhaweeyay in xilligani magaalada laga hirgeliyo shirkad biyo gelineyd oo guryaha magaalada oo dhan beebabka biyo gelineysa “runtii aad baan ugu baahan nahay inaan ka helno biyo caafimaad qaba, waana mashruucii ugu wanaagsanaa ee wayahan aan aragno, iyadoona aan filayno in muuqaalka dadka iyo caafimaadkoodaba wax ka beddeli donto”
Biyaha laga isticmaalo hadda Kismaayo ayaa ah ceelal gacanta lagu qoday oo aad u dhanaan, dadkuna waxay kuu wada sheegayaan in nolol ahaan dadka magaladu ay aad uga liitaan dhinaca biyaha, cabitaanka, qubayska iyo dhar dhaqiddaba saamayn ayey ku leeyihiin biyaha hadda la isticmaalo, aragtiyo kala geddisan oo Ergo ku waydiisay dadka magalada ayeyna ku sheegeen jawaabo isku mid ah, taasoo ah inay tahay qayb ka mid ah laf dhabarta nolosha dadka Kismaayo.
Khadar/MH/MRS
