Iyadoo roobabkii Guga ay ka da`ayaan dalka, ayaa waxaa markii ugu horreysay deegaannada Puntland qaarkood lagu baahiyey qalab casri ah oo lagula soconayo heerka ay gaarsiisan yihiin roobabka da`aya, tanoo wax ka tareysa la socodka is beddelka cimilada.
“17 xarumood ayaan ku xirnay qalabka lagula socdo heerka qiyaasta roobabka ee Ring gages, 2 xarumood oo waaweyn oo si toos ah ugu xiran Satelliteka iyo 15 laamo, waana meelaha aan fileyno inay roobab badan ka da`aan, waxaan ku rajo weyn nahay in deegaannada kalana aan gaarsiinno,” Sidaa waxaa yiri wasiir ku xigeenka wasaaradda beeraha Puntland Cabdiraxmaan Diiriye Carab.
Qalabkan oo ay ku deeqday hay`adda QM u qaabilsan cunnada iyo beeraha ee FAO mashruuceeda SWALIM ayaa waxaa lagu xiray labo xarumood oo kala ah magaalooyinka Garowe iyo Gaalkacyo, halka qalabkan laamihiisa kale la dhigay magaalooyinka Goldogob, Laascaanood, Boosaaso, Badhan, Isku shuban, Burtinle, Qardho, Eyl, Jarriiban, Taleex, Caluula, Boocame, Dangoronyo, Qandala iyo Buuhoodle.
Wasiir ku xigeenka ayaa sheegay in inkastoo roobabku ay ka badan yihiin kuwii la filayay haddana ay usii diyaar garoobeen oo aysan jirin waxyeello ay roobabku geysteen, gaar ahaan beeraha “Ma jiraan wax dhibaato ah oo haatan ay roobabku u geysteen beeraha Puntland oo ah kuwo aad u sii kobcayey waayadan dambe, wasaaraddu waxay waddaa howlo ballaaran oo ay ku caawinayso beeralleyda si aysan roobabka dhibaato ugala kulmin, waana la soconnaa halka ay wax u marayaan beeralleydu”. Ayuu yiri wasiir ku xigeenka.
Magaalooyinka Boosaaso, Badhan iyo Caluula ayaan weli helin roobabka Guga, waxaase roobakii ugu badnaa ay horraantii bishan ka da`een deegaannad Buuhoodle, Laascaanood iyo Galdogob, sida wasaaradda beeraha Puntland ay sheegtay.
Cabdiraxmaan Maxamed Xaaji/FM
