Cudurka duumada ayaa ka dillaacay degmada Ceelwaaq ee gobolka Gedo, sida ay sheegeen shaqaalaha caafimaadka ee degmada.
Maamulaha qeybta caafimaadka ee ururka Bisha Cas ee degmada Ceelwaaq Aadan Cabdi ayaa Ergo u sheegay in dad ka badan 70 qof oo u badan barakacayaasha ku jira xeryaha Ceelwaaq ay duumadu soo ridatay.
Aadan Cabdi ayaa sheegay in tirada ugu badan bukaannada duumadu soo ridatay laga helay jeermiska dhaliya nooc cusub oo cudurka duumada ah oo loo yaqaan (Dengue) oo duumada caadiga ah la wadaaga astaamaha.
Nooca duumadan cusub waxay leedahay qandho aad u sarreysa islamarkaasna malaha wax daawo rasmi ah, marka laga reebo daawooyin caawimaad ahaan loo siiyo bukaannada, sida uu Aadan sheegay.
Labadii toddobaad ee aan soo dhaafnay shaqaalo ka socda xarunta hooyada iyo dhallaanka ee Ceelwaaq ayaa gudaha degmadaas iyo siddeed tuulo oo hoos timaadda ka qeybiyay maro kaneecooyin daweysan oo gaaraya 13,800, sida uu Ergo u sheegay agaasimaha xarunta hooyada iyo dhallaanka ee Ceelwaaq, Aadan Kheyr.
Cabdi weli Maxamed oo ka mid ah dadka deegaannadooda kasoo barakacay ee ku nool Ceelwaaq ayaa isna Ergo u sheegay in kaneeco badan oo ka dhalatay biyaha roobka Guga uu dhex dhigay xeryaha barakacayaasha iyo degmada Ceelwaaq si guud ay sabab u tahay duumada deegaanka ku faafaysa, isla markaana aysan dadku heysan maro kaneecooyin ku filan oo ay kaga hortagaan duumada.
Degmada Ceelwaaq malaha isbitaal ay dadku ka qaataan daawooyinka, wuxuu keliya leeyahay xarun yar oo hooyada iyo dhallaankana lagu xannaaneeyo taasoo aan dabooli karin baahiyaha caafimaad ee bulshada degmadaas. Dadka duumadu heshay badigood ma tagaan xaruntaas, balse qaarkood awooda daawooyinka duumada waxay ka qaataan farmashiyayaasha gaarka loo leeyahay ee degmada, sida uu sheegay Aadan Kheyr.
25ka bisha April oo shalay ku beegneyd waxaa sanad walba caalamka laga xusaa maalinta cudurka duumada.
Axmed Saalixi/MR/FM/AM
