Xaaladda muhaajiriin Soomaaliyeed oo ku xiran xudduuda u dhexeysa dalalka Mozambique iyo Tanzania ayaa laga deyrinayaa kaddib markii muhaajiriintaasi ay soo foodsaartay dhibaatooyin kala duwan.
Dadkaan oo qiyaastii gaaraya illaa 50 ruux ayaa waxaa toddobaadkaan booqday urur samafal ah oo ka dhisan waddanka Mozambique kaasoo lagu magacaabo ururka Daryeel,waxaana dadkaasi ay u geeyeen dawooyin iyo raashin ay cunaan.
Cabdi risaaq Warsame Dirir waa madaxa ururka Daryeel waxaa uu idaacadda Ergo u sheegay in ay booqdeen halka ay ku xiran yihiin muhaajiriintaasi Soomaalida ah waxaana uu sheegay in ay aad u rafaadsan yihiin isla mar ahaantaana aanay haysanin wax ay cunaan, sidoo kale waxaa uu sheegay in ay la ildaran yihiin cudurro kala duwan sida Shuban iyo Duumo.
“Runtii markaanu u tagnay waan la yaabnay sida ay u nool yihiin waxaan u geynay dawooyin kala duwan iyo raashin isugu jira Galley, Saliid, iyo Bariis,waxaana sidoo kale xabsiga ka sii daynay haweeney Soomaaliyeed oo uur todoba bilood ah leh” sidaana waxaa Ergo u sheegay Cabdirisaaq Warsame.
Cabdirisaaq ayaa intaasi ku daray in dadki ay ku soo arkeen halkaasi ay ku jireen saddex haween ah inta kalena ay ahaayeen wiilal dhallinyara ah oo da,doodu ka hooseysay soddon jir kuwaasoo uu sheegay in dhammaantood marka laga reebo saddex maahanee inta kale ay u socden waddanka South afrika,wuxuu kaloo sheegay in ay isku dayeen in dadkaasi ay xabsiga ka sii daayaan hase yeeshee loo diiday waxaa nagu adkaatay sidi aan ku sii deynay gabadha uurka leh taasoo uu sheegay in ay ka mareen dhib badan sii daynteeda.
“Runtii waxaa waliba ka daran dhibaatada ay jidka kala soo kulmeen intaan la geyn xabsiga dhallinyaradaasi, maxaa yeelay markii aan wareystay waxay ii sheegeen in ay dooni ka soo raacen agagaarka Mombasa halkaasoo ay jidka ku soo jireen illaa toddoba habeen ah iyagoo aan helin wax ay cabbaan iyo wax ay cunaan”ayuu yiri Cabdi rasaq Warsame Dirir oo ah guddoomiyaha urur samafal oo lagu magacaabo daryeel oo ka dhisan dalka Mozambique waxaana uu sheegay in dhallinyaradu ay u sheegeen qaar kale oo iyaga la socday oo aan la ogeyn halka ay ku maqan yihiin.
Si kastaba ha ahaatee waxaa muddooyinkii dambe isa soo tarayay dhibaatooyinka soo waajahaya dhallinyarada Somaaliyeed oo u tahriibaysa dalalka Afrika gaar ahaan Mozambique iyo South afrika.
Faarax Dubad/MG/AA
