Marka aad gudaha u gashid suuqyada kala duwan ee gobolka Galgaduud, waxaa kuu muuqanaya goobo ganacsi oo markaad si wanagsan u eegto aysan oollin badeeco badan oo ku cajab geliya, haddana goobtaas yar waxaa laga biilayaa reer dhan.
Dadkaasi waxay u badan yihiin haween suuqyada ganacsiga ka xamaasha, waxayna ganacsigaasi ku dabbaraan carruurtooda waxay ka bixiyaan waxbarashadooda, caafimaadkooda iyo waxay u baahan yihiin.
Sagal Cilmi Xirsi, oo ah haweeney goobteeda ganacsi ku leh gudaha suuqa degmada Dhuusomareeb waxayna iibisaa alaabaha ay dumuraku isku qurxiyaan, maacuunta iyo badeecooyin kale waxayna ka sheekeyneysa sida ay ganacsigeeda yar uga soo saarto nolol-maalmeedka qoyskeeda “Dadka danta yar iyo dadka kale ee noloshoodu ay sarreyso way ku wada ganacsadaan suuqa, haddana marka laga hadlayo dadka danta yar waxay noloshooda ku dabbaraan hadba waxa ay ka helaan suuqa. Mar wax baa lagaa gadan karaa marna waxba lagaama gadanayo, waa qof walba iyo nasiibkiisa.
Haweenku waxa ugu badan ee ay ka ganacsadaan waxaa ka mid ah caanaha, hilibka xoolaha iyo khudaarta. Maryan Cumar Cali waxay iyadana ka warrameysaa sida ganacsigeedu uu yahay “ Aniga waxaan ka ganacsadaa caanaha, carruurta ayaana ku maarreeyaa oo ugu iibiyaa wax walboo ay doonayaan waxaana igu xiriira dad 10 gaaraya. Suuq fiican malaha ka ganacsiga caanaha laakiin shaqo la`aan ayay dhaantaa.”
Saciido Maxamed Iimaan, waxay suuqa ku gadataa khudaar in muddo ah ayayna ganacsigaas ku soo guda jirtay, xilligaan waxay goob ganacsi ku leedahay suuqa bartamahiisa waxana tiri “ Maalmahan suuqa wuu noo kala socdaa oo wuu fiican yahay, waxaana ku maarreeyay ka ganacsiga khudaarta carruurteyda oo xeyn ah.”
Waxaa jira waddooyinka gobolka ganacsi muddooyinkaan dambe si weyn ugu soo badanayay kaasi oo ay abuurteen haween doonaya inay noloshooda ku kaabaan, waxayna haweenkaasi iibiyaan dharka loo yaqaanno huudheyda. Shamso Guuleed Cawaale oo ka mid ah haweenkaasi ayaa iyadana ka warrameysa heerkooda ganacsig “Huudheyda waxaa nalooga keenaa magaalada Boosaaso, mar wax baa laga helaa marna wax faa`iido ah lagama helo, marka nolosheenna ayaan ku dabarnaa.”
Waxaa xusid mudan in ganacsigaan yar yarka ah uu sare u qaaday bilicdii gobolka, maaddaama dad badani ay goobo ganacsi sameysanayaan si ay uga helaan nolol maalmeedkooda.
Cabdijamaal Macallin Axmed/FM
