(ERGO) – Maryan Cabdisamad Muuse oo 14 jir agoon ah ayaa nolosha qoyskeeda oo ka kooban sagaal qof ka soo saarta shaqada kaba caseynta. Waxay ka soo lugeysaa maalin walba degmada Kaxda waxayna timaadda agagaarka isgoyska Dabka oo ka tirsan degmada Hodan si ay u hesho dad ay u baalashto kabaha.
“Mar mar dacaska kaa go’aya sidaad u lugeynaysid. Subaxdii hal saac baan soo baxaya ilaa afar saac baan imaanaya. Beledka waa iska xun yahay. Gabar baan ahay wax badan baa la sheegaya. Mooto raac baa mar walba niyada iga jira. Lacag ma haysto sidaasaan mar walba isaga lugeynaa,” ayay tiri.
Qoyskeeda oo ku nool xero barakac oo ku taalla degmada Kaxda ee magaalada Muqdisho ayaa biisha laba ilaa 3 doollar oo Maryan ay ka soo shaqayso baalashnimada.
“Shaqadan shaqo ka fiican ma arkaysid. Guri shaqo ah waa lagugu gumeysanaa. Waa lagu dilaa. Nimanka kaalay na raac noo soo shaqee bay ku dhahayaan mala amini karo. Dhar dhaqow tabartay ma aha. Wax kalena ma kasayo. Gabar caseeye ahna shaqo ma la siinayo. Tuugo ayay ku maleynayaan. Wiilasha way iska dhib badan yihiin habeenkii haddaad daahdo ma ku dhaafayaan. Dhib badan baan ku qabaa magaalka,’’ ayay tiri.
Qoyska Maryan ayaa ka soo cararay dagaallada ka socda dalka Yemen 2015 xilligaas oo uu ku dhintay aabbaheed oo soo saari jiray nolosha qoyska. Dhibaatooyinka haysta waxaa ka mid ah inay haysan hoy fiican oo ay ka galaan roobka ka da’aya magaalada.
“Gurigeenna waa guri buush ah oo kor roobka ka soo deynaya oo laba qol xataa aan ahayne hal qol ah oo aan isku cariirino. Hoos ma leh barsada. Dan baa noo geysay hoy la’aan,” ayay tiri.
Nolosha qoyska waxaa horey u haysay Maryan hooyadeed balse shantii bilood ee la soo dhaafay waa bukaan jiif ku jira isbitaalka Banaadir.
Welwelka ugu badan ee haysta Maryan ayaa ah inaysan awoodin dhaqaale loo sheegay in hooyadeed ay u baahan in lagu daaweeyo oo gaaraya laba kun oo doollar.
“Cidlo iyo welwel hooyo la’aan miyaa la noolaan karaa. Hooyadey xanuunka haya wax walba waa iiga kurbo badan yahay. Laakiin waxba uma awoodo. Haddaan heli lahayn cid hooyadeen noo daaweysa oo na caawisa way fiicnaan lahayd laakiin cid wax ku siineysa malaha. Niyadda waxaa iga jirta waa la kheyrayaa. Duruufta adag waa laga baxayaa iska samir,’’ ayay tiri.
Da’yartan ayaa sheegtay inay shan ka mid ah carruurta walaalaheed ah oo ay da’doodu u dhexeyso (5-12) ay ka hareen waxbarasho maadi iyo diini isugu jirtay bishi saddexaad ee sanadkan markii ay waayeen lacagta waxbarashada oo gaaraysa 50 doollar bishii.
“Anigoo gabar ah waxbarasho weligey ma helin. Far-Soomaaliga xataa ma aqaan. Waxbarasho la’aan walaalaha yay noqon baan islahaa. Waan awoodi waayay. Biil iyo guri ma isku keeni karo. Af-Soomaali iyo qur’aan in la baro muhiim ayay ahayd laakiin waan awoodi wayney,” ayay tiri.
Faadumo Cabdiqaadir Maxamed oo ah Maryan ayeeyadeed ayaa sheegtay in guud ahaan dhaqaalaha qoyskan uu ku tiirsan yahay gabadhan yar oo aysan jirin il kale. Biyaha iyo korontada ayay ku helaan si bilaash ah. Waxaa ka caawiya dadka la deggan xerada balse waxay iska bixiyaan kirada guriga buul-ka ah oo bishi laga qaado lacag dhan 150 kun oo shilin Soomaali ah.
