(ERGO) – Kun saddex boqol toban iyo saddex qoys oo barakac ku ah xeryo ku yaalla magaalada Baardheere oo hoy la’aan darteed geedaha dugsan jiray ayaa 17 bishii Agoosto helay aqallo ka samaysan teendhooyin oo ay ku caawisay hay’adda maxalli ah ee HAPPEN.
Maxamed Axmed Xasan oo ah 73 jir naafo ah iyo qoyskiisa oo ka kooban siddeed qof waxay ku faraxsan yihiin inay ka mid yihiin qoysaska nasiibka u yeeshay helidda gabbaad ay ka galaan cadceeda, dabaylaha iyo roobka dayrta ee la filayo.
Qoyskan oo ku noolaa miyiga degmada ayaa abaarta ku waayay 68 neef oo ari ahaa. Maxamed ayaa sheegay inay danta ku qasabtay inay barakacnimada nolol ka soo raadiyaan.
“Naf baan la soo cararay magaalada iyo meesha uun la joogo dad leh iyo meesha biyo leh. Hoyga aad baan ugu faraxsanahay. Waa na loo dhisay, alaabna waa nala siiyay oo maacuun ah,” ayuu yiri.
Wuxuu sheegay inuu dadka ka codsado inay caawiyaan maadaama uu yahay naafo aan qaban karin shaqooyinka xamaaliga ah sida dhismaha guryaha iyo dajinta rarka gaadiidka xamuulka.
“Magaaladaan iska aadnaa. Dadka iska soo shaxaadnaa. Mid hal doollar na siiyo. Nin tumin sonkor ah na siiyo. Wax na siiya yaan dhahnaa. Saddexda waqti hal maraan wax cunnaa,” ayuu yiri.
Wuxuu ku lab qabowsanayaa inuu carruurtiisa u helay hoy balse weli wuxuu la daalaa dhacayaa sidii uu ugu heli lahaa quud maalmeedka nolosha.
Qoysaska guryaha la siiyay ayaa laga soo xulay lix xero oo ku yaalla magaalada Baardheere. Waxay isugu jireen kuwo degganaa guryo ciriiri ah iyo kuwo geedaha ay u ahaayeen hoy.
Cabdi Bare Faarax oo ah 60 jir iyo qoyskiisa 15 qof ah 11 bilood ayay ku noolaayeen aqal cariiri ah balse hadda waxay heleen guri waasac ah iyo maacuun ku filan.
“Hoyga hadda waan haysanaa. Hoy fiican baan ku noolnahay. Qalabkii waan haysanaa. Marka anfacadii iyo noloshii ayaan u baahan nahay,” ayuu yiri.
Qoyska Cabdi oo bishii Novenber 2021 abaarta ku waayay 300 ari iyo 20 lo’ ayaa ka soo barakacay baadiyaha deegaanka Fafaxdhuun ee gobolka Gedo.
Waxay hadda ku nool yihiin xerada Iftiin ee magaalada Baardheere. ma jirto il dhaqaale oo ay ku tiirsan yihiin. Wuxuu hay’adaha samafalka ka codsaday inay gargaar degdeg ah la soo gaaraan.
“Daruufo iyo baahiyaha jiro ayaa halkan i keentay. Adigu maalinkii hal mar ayaa wax la helaa inta badan. Nolosheyda aad ayay u adag tahay. Gargaar ayaan u baahan nahay,” ayuu yiri.
Yusuf Aadan Cumar oo ah injineerka hay’adda HAPPEN u qaabilsanaa dhismaha guryaha ayaa Raadiyow Ergo u sheegay inay qoysaska ku soo xusheen hadbo sida ay baahiyahoodu u kala ballaarneyd.
“Dadku inta badan qaab lagu soo xusho ayaa jirta sida dadka cusub oo barakac cusub ah oo markaa soo dagay. Waxaa ku jiro dadka curiyaamiinta ah, dadka da’da ah. Waxaa ku jiro dadka laga tiro badanyahay, qoysaska caruurtooda aadka u badan yihiin intaas iyo in kale oo badan,” ayuu yiri.
