(ERGO) – Cabdiweli Yuusuf Xaaji wuxuu dib ugu soo laabtay deegaanka Biyo Cadde oo 40 km dhanka bari ka xiga magaalada Eyl, halkaas oo uu labo bil ka hor uga hayaamay abaarta darteed. Wuxuu ka walwalsan yahay sii noolaashaha xoolo u haray.
Ninkan ayaa la hayaamay xoolihiisa iyo qoyskiisa oo ka kooban lix qof bishii Diseembar ee 2021. Wuxuu u naq raacay deegaanka Isku-shuban ee gobolka Bari oo uu roob yar ka da’ay deyrtii la soo dhaafay. Balse, waxaa halkaas isugu tagay xoolo-dhaqato badan, taas oo keentay in daaqii yaraa uu durba dhamaado.
Cabdiweli wuxuu ka soo noqday degmada Isku-shuban markii uu daaqii dhamaaday, wuxuuna mar kale u hayaamay deegaanka Rako oo uu ay sidoo kale isugu yimaadeen xoolo-dhaqato badan. Ujeeddada uu u hayaamay ayaa ahayd in xoolihiisa uu u helo biyo iyo baad, balse markii uu soo waayay, waxay dantu ku qasabtay inuu dib ugu soo laabto deegaankiisa.
“Guryaheenna ayaan isaga soo laabannay, abaarta wali way na haysaa. Lacag $1,900 ayaa iga baxday, xoolaha iyo qoyska ayaan gaari ugu kireeyay,” ayuu yiri.
Wuxuu tilmaamay in tan iyo markii uu soo laabtay uu suuqa kula noq-noqonayo 10 neef oo ari ah, balse uusan helin cid ka iibsata, maaddaama ay caato yihiin.
Cabdiweli wuxuu Isku-shuban ula hayaamay 200 oo ari ah iyo 40 neef oo geel ah. Waxaa waddada uga sii dhintay 50 neef oo ari ah iyo shan geel ah. Wuxuu sheegay in 300 oo qof oo ay iska raaceen deegaanka Biyo Cadde ay intooda badan dib u soo laabteen.
“Xaaladda aad iyo aad bey u adag tahay, waxayna u baahan tahay in wax laga qabto. Waxaan dowladda ka codsaneynaa inay na soo caawiso. Cunto-la’aan ayaa na haysata, xoolihiina iib ma lahan,” ayuu yiri.
Maxamed Cabdi oo ula hayaamay qoyskiisa oo ka kooban siddeed qof deegaanka Rako oo 90 km bari uga beegan magaalada Qardho ayaa sidoo kale dib ugu soo laabtay deegaankiisa oo lagu magacaabo Godbo oo hoostaga degmada Eyl bishii Jannaayo. Wuxuu xusay inuu go’aansaday inuu dib u soo laabto kaddib markii uu daaqii dhamaaday.
Ninkan oo deegaankiisa kala hayaamay 300 neef oo ari ah ayaa la soo laabtay 230 neef, intii kale waxaa ku go’ay rarkii uu gaariga ugu sameeyay.
“Labo gaari ayaan raacnay si aan u gaarno halkii aan u soconay. Gaarigii koowaad oo iga qaatay $600 waddada ayuu ku jabay, mid kale ayaan $200 ku kireysannay. Abaarta darteed ayaan guryaheenna uga tagnay, si aan xoolaha u badbaadinno,” ayuu yiri.
Maxamed ayaa xusay inay la daalaa-dhacayaan nolol-maalmeedka qoysaskooda maaddaama dukaamadii ay ku tiirsanaayeen ay ka joojiyeen inay siiyaan deyn. Ma haystaan biyo iyo cunno toona.
Agaasimaha hay’adda Maareynta Musiiboyinka ee Puntland (HADMA), Cabdullaahi Xaashi ayaa sheegay in dhibaatada ugu weyn ee ay dadkaasi wajahayaan ay tahay biyo-la’aan. Wuxuu xusay in ceelasha qaar ay jabeen, keydadka biyahana ay qallaleen. Wuxuu tilmaamay in ay sii korortay tirada qoysaska u baahan gargaarka degdegga ah.
Cabdullaahi ayaa sheegay in saameynta abaarta ay sii biirisay sicir-bararka, ayaxa iyo sidoo kale xayiraadihii COVID-19.
