(ERGO) – Roob watay dabaylo iyo daad oo habeenkii Jimciha ka da’ay degmada Guna-Gado ee dowlad deegaanka Soomaalida ayaa waxaa ku barakacay 824 qoys halka ay ku le’edeen 1,500 oo ari ah iyo 25 oo lo’ ah.
Badal Axmed Sagal oo ka mid ah dadka xoolo dhaqatada ah ee uu saameeyay roobkan ayaa ku waayey daadka 10 ka mid ah 20 neef oo ari ah, kuwaas oo uu ku dhaqanaayay xaafadda sadexaad ee degmada Guna-Gado.
“Ani iyo carruurtii meel cidla ah ayaan taaganahay. Waxaan taaganahay iridka aqalkii ay biyaha noogu soo galeen. Tobankii ari ee dhintay bakhtigooda banaanka ayaan ku soo tuurey. Kuwii haray qaar ayaa sakaraad ah,” ayuu yiri Badal oo Raadiyo Ergo khadka teleefoonka ugu warramay.
“Hadaddaan aan ku la hadlaayo arladi ma arkaayo biyo cad ma ogi.”
Badal ayaa xusay in asaga iyo carruurtiisa ay jimcihii ku waa bariisteen taagnaan aqalkooda dhexdiisa ah cabsi ay ka qabeen in daadka qaado awgeed. Wuxuu sidoo kale sheegay in daadku ka qaaday cunto yar oo ay keyd ahaan u haysteen oo uu reerka karsani jiray.
“Aad baan isaga jilicsannahay, xilli soon ah waan joognaa. Caruurta wax ay cunaan uma hayo hataan,” ayuu yiri Badal.
Daadka uu roobku sababay ayaa kala tagay maacuuniti iyo agabki jiifka. Badal ayaa sheegay in roobku uu si kadis ah ku helay oo uu ku mashquulay badbaadinta carruurta iyo xoolaha.
Madaxa xafiiska maaraynta khataraha masiibooyinka ee degmada Guna-Gado ee gobolka Jarar, Abshir Axmed Muxumed, ayaa sheegay inay jiraan qoysas ka barakacay daadadka. Wuxuu sheegay in saddex ka mid ah xaafadaha ay daadku si uu si aad ah u saameeyay.
Abshir ayaa sheegay in xafiiskiisa uu diwaangeliyay qaoysas gaaraaya 824 kuwaas oo ka barakacay guryahooda.
“Waxay nagu qaadatay 24 saac in aan ogaanno dhibaatooyinka ka dhashay roobka. wuxuu roobku saameeyay guryihii qoysaska iyo xoolo dhaqatada,” ayuu yiri Abshir.
Dabayshi la socotay roobka ayaa guryaha qaar jiingadaha ka qaadey kuwaasi oo ay daadaku sii qaadeen. Qoysaska ayaa ka war helay ayagoo dhex fadhiya guryo aan jiingado lahayn.
Abshir ayaa sheegay in xafiiskiisa uu kaliyaha awooday in uu gargaar isugu jira raashin, bustooyin iyo teendhooyin u qaybiyo 400 oo qoys oo ka tirsan 800-dda boqol ee qoys ee uu daadku saameeyay.
“Wali ilaa iyo 424 qoys ayaa caawinaad u baahan, balse wixii aan haynnay waxay ku filnaadeen afar boqol oo qoys,” ayuu yiri.
