(ERGO) – Masjidka Towba ee magaalada Qardo ayaa muddo sanad ah waxaa si toos ah looga dhaqan-geliyay nidaamyada ka hortagga xanuunka Koofid-19, si loo ilaaliyo caafimaadka jameecada masaajidka maaddaama uu cudurku ku sii faafayo Soomaaliya.
Mas’uuliyiinta masaajidka ayaa xiray goobaha weysada waxayna sidoo kale jameecada amreen inay la yimaadaan saliyo u gaar ah. Rooggii masaajidka ayaa laga qaaday maaddaama uu keeni karo in haddii ay dadka iskula tukadaan ay ka dhalan karto nadaafad-darro faafin karta cudurka.
Jameecada masjidka ayaa ku khasban inay xirtaan afxirkooda mar walbo ay masaajidka imaanayaan, waxaana sidoo kale la ilaaliyaa kala-fogaanshaha marka salaadda la tukanayo.
Imaamka masjidka, Cabdullaahi Yuusuf Kilaas ayaa u sheegay Raadiyo Ergo in mas’uuliyiinta masaajidka ay si iskood ah ugu dhaqaaqeen inay dhaqan-geliyaan nidaamyadaan si looga hortago faafida cudurka Koroona.
“Bataatan roog waan joojinnay xaaladda caafimaad ee jirta awgeeda. Roogga waxuu soo qaadayaa wasaq badan iyo wax badan oo cudurka soo jiidan kara. Waxaan ka taxaddarnaa arrimaha nadaafadda oo dhan,” ayuu yiri.
Dhulka masjidka laga dhisay waxaa bixisay haweeney Soomaali ah, taasi oo geeriyootay ka hor intii aan la dhameystirin dhismaha masaajidka. Carruurteeda oo ku nool qurbaha ayaa la wareegay dhameystirka dhismaha masaajidka iyo maalgelinta joogtada ah ee ku baxda howl-socodsiintiisa. Carruurtaan ayaa u soo iibiya masjidka jeermisdile lagu dhaqo mutuleelka masaajidka salaad walbo ka hor iyo kaddib inta aan ka aheyn salaadda subax oo imaamku uu sheegay in dad yar ay ku soo tukadaan masjidka.
Masjid Towba ayaa ah masjidka keliya ee ku yaalla Qardho ee dhaqan-geliya shuruudaha caafimaad ee xanuunka Koroona. Imaamka masjidka ayaa sheegay in arrinkaan uu soo jiitay dad badan oo qaarkood ka yimaada meelaha ka fog masjidka tan iyo intii uu cudurka dalka ku soo labo-kacleeyey.
“Marka ay dadka nagu cusub diidaan kala-fogaanshaha waan u sheegnaa in ay ka fiican tahay nafta badbaadinteeda saf la isku dhawaado, waayo salaadda in la isku dhowaado way fiican tahay, balse haddii xaalad ka daran ay timaado caafimaadka waxaa weeyaan safkii waa lagu kala kacayaa. Bal salaadda ayaaba haddii ay xaalad caafimaad timaado la joojinayaa, masaajiddaba laga joojinayaa, haddii ay xaaladda caafimaad ee waxa waaye adkaato.”
Cismaan Aw Muuse oo ka mid ah dadka deegaanka ee ku xiran masjidka Towba ayaa Raadiyo Ergo u sheegay in maalin walba uu shanta salaad uga yimaado xaafaddiisa oo masaajidka u jirta hal kilomitir iyo bar.
“Masaajidkaan aniga waxaan ku doortay dhaqan-gelintooda ay dhaqan-geliyeen kala-fogaanshaha. Waxaan soo maraa dhowr masjid marka aan xaafaddeyda ka soo socdo, balse masaajidda kale ma ilaaliyaan nidaamyada ka hortagga cudurka Koroona,” ayuu yiri.
Cismaan ayaa sheegay in jameecada masjidka ay tan iyo sanadkii 2020-kii ilaalinaayeen kala-fogaanshaha oo ay isu jirsanaayeen ilaa iyo hal mitir.
Hase yeeshee, nidaamka ka jira masjidka oo caan ka noqday bulshada Qardho dhexdeeda ayaa walaac dhanka dadka soo badanaya ah ku dhaliyay Cismaan, maaddaama ay boosaskii u dhaxeeyay dadka tukanaya ay soo yaraanayaan, taasina ay dhalin karto in meesha ay ka baxdo kala-fogaanshaha.
Wuxuu ku boorriyay imaamyada masaajidda Qardho inay ku daydaan masjidka Towba oo ay dhaqan-geliyaan nidaamyada ka-hortagga cudurka.
Maxamuud Xirsi oo asagana ka mid ah jameecada ayaa xusay in uu ku doortay masjidkaan dadaalka ay ugu jiraan badbaadinta bulshada awgiis.
Wuxuu kula taliyay dadka isugu imaanaya masaajidka inay mar walbo ilaaliyaan nidaamyada caafimaad ee looga hortagayo faafidda cudurka oo aysan keliya ku koobin xilliyada ay masjidka joogaan.
“Cudurka Koroona waa wax jira, waxaana uga badbaadi karnaa keliya inaan xiranno afxirka, sidoo kalena aan ilaalinno nidaamyada caafimaad ee kale,” ayuu yiri Maxamuud.
