(ERGO) – Qaar ka tirsan beeralayda degmooyinka Doolow iyo Beled-xaawo ee gobolka Gedo ayaa joojiyay inay beertaan tacab kadib marki dhibaato dhaqaale ay ka soo gaartay fatahaadda webiga iyo ayaxa oo ka baa’iyey dalagyo u beernaa sanadki hore.
Beeraha qaarkood ayaa laba jeer waxaa khasaare gaarsiyay webiga oo ku fatahay halka laba jeer oo kalana uu ayaxa ku dagay. Arrimahan isbiirsaday ayaa saamayn dhanka nolasha ah ku yeeshay qoysaska beeraha iska leh, dadka ka shaqaysta iyo kuwa ka ganacsada.
Qurbac Afjar Caduur, oo qoyskiisu ka kooban yahay 15 qof, beer 13 hiktar ahna ku leh tuulada Dayax oo Doolow u jirta 7 KM, ayaa ka mid ah dadka ay arrimntan saamaysay. Bilihi May iyo Novenber sanadki hore (2020), ayuu ku fatahay webiga Daawo iyo bishi December oo laba jeer uu ayax kaga dagay. Nolasha qoyskiisa ayaa hadda ku tiirsan raashin ay iska soo ururiyaan dad ay ehel yihiin oo ku sugan Beledxaawo.
“Way adagtahay in aan ka soo kabanno dhibataada na gaartay ee uu ayuxu noo geystay, inkasto aan isku daynay ka hortag”, dalaggi beeraha fatahaadda ayaa iga baabi’isay, geed miroodki soo haranaya ayax ayaa cunay”. ayuu yiri Qurbac.
Intaas kadib Qurbac ayaa go’aansaday in uu joojiyo beerashada, inkastoo uusan haysan qorshe kale oo uu ku dabaro nolasha qoyskiiska, sideed ka mid ah carrurtiisa ayaa guri jooga ah oo muddo sedex bil ah aan aadin, sabab la xiriirta in uusan awoodin bixinta lacagta lagu dhigto iskuullka oo gaaraysa $80. Waxaa sidoo kale is dhimay qaabki ay raashinka u karsan jireen.
Cali Axmed Cusmaan oo beer 21 hiktar ah ku leh duuleedka waqooyi-galbeed ee Doolow, ayaa webiga Daawo oo fatahay bishii shanaad ee sanadkii tagay, Waxaa ka khasaaray dalagayo kala duwan oo uu ku maalgaliyey lacag dhan $3780.
“Waxaan ku maalgaliyey lacag badan, aniga oo beeryay 30 kiilo basal ah, 40 kiilo oo khudaar kala duwan ah, 300 oo geedka booska ah, 170 geed oo liin dhanaan ah iyo gallay, waxaas oo dhan waxaa waxba kama hayo”.
Marki uu waayey guud ahaan dallaggi u saaraa beerta sida basaha,yaanyada,qaraha iyo qudaar kale ayuu go’aansaday in uu iska joojiyo in uu mar kale kharash galiyo beerta maadaama uu khasaare xooggan soo gaaray.
“Mar labaad bay i saameysay tii hore gu’gii bay ahayd tii dambana deyrtii bay ahayd, fatahaaddii markay dhacday wax ka soo baxay maba jirinba, markaa ka bacdi waan abuurnay oo waxaan ku abuurnay xoogaa khudaar iyo galleey ah ayaxii baa nooga dagay”.
Cali qoyskiisa nolol ahaan ku tiirsanaa beerta waxaa ciriir galay nolal maalmeedka. Hadda waxay ku tiiran yihiin ari oo u qaarkood soo iibiyo kadibna uu ku maareeyo nolasha.
Waxaa sidoo kale shaqo la’aan ku dhacday dad badan oo ka xamaalan jiray beeraha oo kala soo bixi jiray nolal maalmeedka.
