(ERGO) – Carab Maxamed Cabdi waa aabbaha qoys shan ruux ka kooban waxay ka mid yihiin 350 qoys oo ku nool xeryaha lagu barakacay ee degmada Doolow oo ay saameeyeen daadad ka dhashay roobabka Guga.
Qol ka sameysan bullikeeti ayuu qoyskiisa ku jiray kaas oo muddo saddex sano kahor ah uu maamulka degmadu ku wareejiyay. Waxaa uu Raadiyo Ergo u sheegay in xilligan ay ku hoydaan geed bac ay ku wareejiyeen markii daadku dumiyay qolkii ay degganaayeen.
“ Marka la iskuma aamini karo gurigii waa qoyay siduu u joogo habeenkii adoo jiifo ayuu rug iska leeyahay, waa un banaanka ha laga joogo oo ha la iska seexdo.”
Keli kuma ah qoysaska ku guri waayay roobabkan daadadka wata, afartan qoys oo kale ayaa ku wehliya hoy xumada. Nolosha qoyskiisa ayaa ah mid ku tiirsanayd gaari dameer uu wabiga biyaha ugu soo dhaamin jiray kuwaas oo xaafadaha magaalada ugu iib-geyn jiray balse xilligan ay taa meesha ka baxday markii uu wabiga biyo keenay.
“ Hadda wabiga waa biyo keenay, buundadii iyana hadday sidan noqoto buundadaa maraynay oo waxaan raasanaynay al-yoom labada dhinacba, al-yoomkii waa istaagay wallaahi noloshaas aad bay u liidataa.”
Nuur Maxamed Faarax oo ah 45 jir ku nool xerada siddeedaad ee barakaca Kabaaso, waxay 30 qoys xilligan ku deggan yihiin meel bannaan ah markii aqalladoodii oo ulo, maryo iyo kartoomo la isku xiray ka sameysnaa daadad ugu galeen dabayaaqadii bishii hore.
Nuur oo qoyskiisa ka kooban yahay 12 qof, wuxuu afar sanno kahor abaar ka baabi’isay 230 neef oo ari ah taasoo keentay inuu ka soo cararo deegaanka Miro-dhuubo oo hoos tagta degmada Luuq. Nuur wuxuu Raadiyo Ergo uga warramay sida ay daadadka ka dhashay roobabka guga u wax yeeleeyeen.
“ Habeenkiina bannaankaasaan iska seexannaa, roobabkii ayaa na yeeshay, daadad baa nagu soo galay guryihii, alaabtii iyo kabayaashii ciyaalka iyo maacuuntii iyo wixii oo dhanba meesha tog bey ahayd biyihii saas u daadaayayaa na qaaday.”
Nuur waxaa uu shitaa maqaaxi yar oo ku taalla gudaha xerada uu barakaca ku yahay taas oo maalinkii labo waqti laga heli jiray halka bishan Ramadaan uu sameeyo 200 oo xabo oo sambuus ah kuna dabbaro nolosha qoyskiisa danta yar, kuwaa oo maalinkii hal waqti wax karsada.
Marka laga soo tago qoysaskan ka barakacay guryihii ay xeryaha ka degganaayeen waxaa jira kuwo weli ku sugan guryihii oo daadadku galeen.
Waxaa ka mid ah Kiin Macalin Cali oo haysata 3 caruur ah oo aabahood kala tageen.Muddo labo sano haatan laga joogo ayay ka soo barakacday tuulada Diido-canaani oo hoos tagta degaanka Boholgaras ee gobolka Gedo.
Waxay aqalka ay ka deggantahay xerada Qansaxleey 27-kii abriil ugu galay daad ka qaaday maacuuntii ay wax ku karsanaysay, waxay Raadiyo Ergo u sheegtay in ay xilligan ku adag tahay nolosha una baahan yihiin iyada iyo boqollaal qoys oo xeyaha duruufo nololeed ku haysta in lala soo gaaro gargaar bini`aadannimo.
Degmada Doolow ayaa tan iyo 2011waxay marti galisay in ka badan 8,000 kun oo qoys kuwaa oo abaaro iyo colaado isbiirsaday uga soo barakacay deegaannadii ay ku noolaayeen oo inta badan dhaca foonfurta Soomaaliya, waxayna xilligan xeryaha ay ku soo barakaceen ku wajahayaan duruufo adag oo ay ugu wayn yihiin hoy la’aan iyo cunno yari
