(ERGO) – Lix kun oo qoys ayaa tan iyo siddeeddii bishan ku barakacay fatahaad ay sameeyeen webiyada Jubba iyo Daawo ee mara degmada Doolow iyo tuulooyinka hoostaga ee gobolka Gedo, sida uu sheegay guddi uu maamulka degmada u xil-saaray qiimeynta khasaarihii ka dhashay fatahaadaha.
Cabdiqani Xasan Uumiye oo ah afhayeenka guddiga oo maanta warbaahinta kula hadlay Doolow ayaa sheegay in ay sidoo kale fatahaaduhu baabi’iyeen dalaggii ku beernaa 1,230 beer, matoorradiina ay biyuhu ka qaadeen. Waxay biyuhu xannibeen waddada u baxda dhanka Beled-Xaawo, taas oo khasabtay in ay gaadiidku u wareegaan waddooyin kale.
Afhayeenka ayaa xusay in ay gurmad degdeg ah iyo dib-u-dejin u baahan yihiin qoysaska qaar oo hoy-la’aantu ay bidday inay dulsaar ku noqdaan dad magaalada deggan iyo qaar kale oo xaalad adag ku wajahaya xeryaha lagu barakacay, kaddib markii ay biyuhu ka qaadeen agabkii guryaha u yaallay.
Uumiye ayaa dadka kula taliyay inay ka fogaadaan dhulka webiga u dhow ee jooggiisu uu hooseeyo, maaddaama uu sii kordhayo heerka biyaha webiga.
Fatahaadda ugu daran waxay labada Doolow ee ku yaalla xadka Soomaaliya iyo Itoobiya ku dhufatay 11-kii bishan, cabsiduna way sii kordheysaa.
Waxaa barakacay inta badan qoysaskii deggenaa xaafadaha Ceelasha biyaha, Dhagaxley iyo Garboolow ee Doolow Soomaaliya iyo Jiiqley iyo Xaafad-koowaad ee degmada Doolow Addo ee dhanka Itoobiya oo guryahooda ay biyuhu dhex fariisteen. Biyaha waxay sidoo kale burburiyeen goobo ganacsi iyo musqulo.
Waxaa weli xaafadaha qaar ku sugan dad awoodi waayay inay barakacaan dhaqaale-la’aan darteed. Waxaa ka mid ah Sacdiyo Xuseen Xasan oo ah 37 jir haysata toddobo carruur ah, welina ku sugan xaafaddeeda Garboolow.
“Halisaan ku jirnaa guryihii waa naga galeen [biyaha], goglihii waa naga qoyeen raashinkii ilmaha waa naga qooyeen, ilmihii yaryarka ahaa ilaa saaka waan la taaganahay, musqulihii waa naga dumeen meelaan galno xitaa ma aragno, caawada meelaan barinno xitaa ma naqaano.”
Bashiir Maxamed Aadan oo ka mid ah dadka ka barakacay xaafadda Dhagaxley wuxuu qoyskiisa oo ka kooban sagaal qof u raray xerada lagu barakacay ee Qansaxley ee duleedka ku taalla.
“Haddee qaboowgaan iyo roobabkaan meel aan ka galno malaha guryihii waa naga jiijiifaan.”
Gaari-dameer uu uga shaqaysan jiray buundada xuduudda ayuu reerkiisa ku daabulay, isagoon sabankanba shaqaynin taasoo ay ugu wacanayd xirnaanshaha xuduudda kahortagga cudurka Koronaha awgii, waxayna noloshiisa ku tiirsan tahay kaalmada dad qaraabo ah.
Marka laga soo tago qoysaska barakacay, waxaa jira beeraley ay fatahaaddu gaarsiisay khasaaro wayn. Cali Axmed Cismaan oo ah guddoomiyaha Iskaashatada Beeraleeyda Daawo ayaa Raadiyaha Ergo u sheegay in wabiga Daawo oo keliya uu baabi’iyay dalagyadii ku beernaa beero gaaraya 200, isla markaana ay jiraan matoorro ay daadadku la tageen.
“Sannadihii hore abaar xun bay ahayd, ayax baa maray oo dhulka gooyay fatahaad xoog leh oo hadda ku timaaday beerihii aan tacbannay oo dhibaatadaa noo geysatay, hal beer oo fiyoow ma jirto.”
Xuseen Nuur Barre oo ah aabbaha qoys ka kooban lix qof, Xuseen oo dukaanle ah wuxuu sheegay inuu daadku kala tagay bagaash qiimihiisu yahay 4,000 doollar.
“Wixii hanti iyo dukaan ii yaallay biyuhu way la tageen gurigeyga wixii yaallay oo dhan way galeen. Dariska iyo xaafadaha igu dhow hadda meel la joogo ma jirto.”
