(ERGO) – Xarunta Hooyada iyo dhallaanka deegaanka Wardheer-bari oo 30 km u jira magaalada Carmo ayaa hadda shaqeeya habeenki kaddib marki dhallinyaro is-xilqaantay ay soolarro ku xireen dhawr meelood oo deegaanka gudihiisa oo MCH-ku ka mid yahay.
Maxamuud Baxwal Cali oo ah maamulaha xarunta ayaa raadiyo Ergo u sheegay in xarunta oo shaqaynaysay muddo sanad ah aysan habeen u adeegi jirin hooyada iyo dhallaanka maadaama uusan jirin iftiin. Wuxuu kaloo tilmaamay in hadda habeen iyo maalinba ay si joogta ah u shaqayso maadaama gudaha iyo banaankaba layrar loogu xiray.
“Habeenkii waxay noqon jirtay qofkii u baahan inaan u furno oo aan toosh wixiisa ku soo siinno, kaddibna aan iska xirno, laakiin haddeer waxay noo noqotay inaan caadi u shaqayno ”Ayuu Yiri Maxamuud.
Yaasiin Cabdi Idaale waa gudoomiyaha dhallinyarada deegaanka Wardheer-bari, waana fikradii ka dambaysay in deegaanka la iftiimiyo. Sida uu sheegay Yaasiin waxaa fikraddan lagu hirgeliyay dhaqaale ay iska soo ururiyeen dadka deegaanka si loogu hawlgalo in la helo iftiin, iyadoo la adeegsanayo qorraxda (Solar system), tallaabadii kowaadna wuxuu deegaanku soo iibsaday ilaa 30 xabbo oo qalabkaas ah oo midkiiba ku kacay $600.
“Mashruucaan markaan celcelis ahaan isku xeeriyo waxaa ku baxay $18kun waxaa ka shaqeeyey dhalinyaro gabadho iyo wiilal ka kooban, aad bay u soo dhaweeyeen dadka deegaanka, nin walba wixii tabartiisa ah ayuu ka qayb qaatay”. Ayuu yiri Yaasiin.
Xarunta MCHka Caafimaadka oo gelin hore shaqayn jirtay qaabili jirtayn 15 Qof ayaa mararka qaar ka fursan weyday in xaalado deg-deg ah loo furi jiray habeenkii sida uu sheegay maamulaha xarunta Maxamuud Baxwal ayaa wuxuu raadio Ergo uga warramay caqabadaha ay kala kulmi jireen markii ay la soo daristo xaaladaha degdegga ah, sida markii ay umulayaan haween xilli habeennimo ah, taasoo ay ku kallifi jirtay iney adeegsadaan tooshash. Nasiibwanaag hadda MCHka wuxuu yeeshay layr ,wuxuuna guud ahaan qaabilaa habeen iyo maalin 25 Qof.
25ka mida Layrarkan ayaa lagu xiray wadooyinka muhiimka ah ee deegaanka oo ku yaallaan goobaha ganacsiga halka 5-ta kalana lagu xiray goobaha caafimaadka, waxbarashada iyo masjidka magaalada.
Ayaan Maxamuud Maxamed oo goob ganacsi oo raashinka bisil lagu iibiyo ku haysta deegaanka lehna 10 carruur ah, ayaa sheegtay in iftiinka loo yeelay magaalada uu isbaddal fiican ku keenay shaqadeeda.
“Habeenki maan ganacsan jirin mugdi bay ahayd magaaladu, Alxamdu Lillaah haddeer waxaan ka faa’iideysannay in goobahayagu furnaadaan habeenkii.” Ayey tiri Ayaan.
Macaamiisha rugta ganacsiga ee Ayaan waxaa u badan gaadiidleyda isaga goosha gobollada oo iminka xataa ku talagala iney habeenkii ka heli karaan goobteeda adeeg, iyadoo saacado badan furan. Ayaan oo la hadleysa raadiyo Ergo waxay sheegtay inuu kordhay dhaqaalihii ay ka heli jirtay mehradda taasoo ay ugu wacan tahay iftiinka la helay oo keenay iney saacado badan shaqeyso.
“ Hal gelin baan shaqayn jirnay labo gelin shaqaynteeda wax badan bay is dheer yihiin, Maalintii waagii mugdi ahayd waxaan ku xisaabtami jiray 50$, Hadda dhaqaalahii sidii hore waa ka fiican yahay way laba jibbaarmay 120, $130”Ayey tiri Ayaan.
