Ku dhawaad 2.2 milyan (Laba milyan iyo laba boqol oo kun) oo ari ah ayaa la beegsanayaa in laga talaalo xanuunka ku dhaca ariga ee loo yaqaano Sambabka, xoolahan oo ku dhaqan goboladda dhexe ee Soomaaliya ayaa tallaalkoodu bilowday 25 kii bishii January ee sanadkan 2020 ka iyadoo uu socon doono mudo laba bilood ah.
Dr Sulaymaan Maxamed Faarax oo madax u ah urur maxalin ah oo fulinaya talaalkan kaasoo magaciisa la yiraahdo CERELPA, ayaa Radio Ergo u sheegay in tallaalkan uu fulinayo ururkooda oo dhanka dhaqaalaha ay ka taageerayso hay’adda cunnada iyo beeraha u qaabilsan qaramada midoobay ee FAO. waxaana talaalkan laga bilaabay deegaano hoostaga gobolka Mudug gaar ahaana Saddex-higlo, Dagaari, Gawaan, Wisil, Ceelguula, Galinsoor, Budbud, Hobyo iyo qaar kale.
Daahir Maxamed Colow oo ah aabaha sagaal caruur ah oo ku nool deegaanka Gawaan ayaa 47 kamid ah arigiisa oo ka kooban 50 neef waxaa laga tallaalay cudurka Sanbabka, iyadoo 3 riyo ah oo hore xanuunku ugu dhacay aan la talaalin Islamarkaana ariga laga soocay oo gaar loo xareeyo.
Daahir oo lahaan jirey 200 oo ariga ayaa inta badan xoolihiisii waxay uga dhinteen abaaraha iyo xanuunka Sambabka. bishii lasoo dhaafay ayaa 4 Ari ah waxaa ka diley xanuunka sambabka oo saameeyey in badan oo kamid ah xoola dhaqatada deegaanka Gawaan oo 30 KM u jira degmada Hobyo ee gobolka Mudug.
“Sambabka maanta ka hor talaalkiisa maanan arag, Haddana waa la tallaalay, In uu ku soo laabanayo iyo in uusan ku soolaabanayn ilaahay ayaa og, Laakiin waa ka hortag, Ka hortagaas haddii arigu sida saaka uu qama dhaco la’yahay u fiicnaado waan rajaynayna, in uusan mar danbe sambabku ku soo laaban oo uu ka tago, oo sanad danbe uusan ku dhicin, Haddii uusan dib danbe ugu dhicin si fiican ayay noo anfacaysaa.” ayuu yiri. Daahir.
Daahir ayaa intaas ku daray in xoolaha sambabku haleelo ay ku durijireen Daawada loo yqaan OGOS oo ah nooc kamid ah irbadaha qalajihaha ah (antibiotics), Taasi oo neefku u dhaxaynayo nolol iyo dhimasho marka lagu duro. Waxaa uu xusay in dhibaatada ay kala kulmeen daawadaas marka xoolaha lagu duro ay ahayd in Ariga riman ay ilmaha soo tuuraan taasi oo xoolo yari ku ri’day maaddaama tarankii xooleed ay saamaysay.
“Awal Arigu wuu iska bukijiray maalin walba waxaan arkaynay mid diif leh oo dhamaaday markaas baan durijirnay, halkaas bowdada ah ayaan kagalin jirnay cirbadda, Haddii uu rimanyahay neefku wuu dhiciyaa haddii kalana wuu iska roonaada, Hadda sida naloo sheegay haddii cudurka sambabka uusan ku dhicin Ariga riman wuu kanabad galaya wuuna dhalaya, Dadka I dhow oo dhan waa loo tallaalay xoolaha, Marka xeryo ii dhow oo qaarkood laba tiro gaaro ayay talleeleen.” ayuu yiri.
Dr Suleyman ayaa sheegay in Cudurka Sambabka uu si dhakhso ah u fido Islamarkaana hadda uu yahay cudur ku faafaya badhtamaha Soomaaliya. Waxay qorsheynayaan inay mudo todobaad ah ku talaalaan in ka badan hal milyan oo ah ari ku dhaqan deegaanada Koonfureed ee gobolka Mudug ka hor inta aysan u gudbin gobolka Galgaduud maalmaha soo socda.
Aways Axmed Cali, oo ah aabe leh shan caruur ah, ayaa loo tallaalay 150 ka mid ah arigiisa oo dhan 170 neef. Riyaha waa la kala soocay, oo kuwa xanuunsan ee uu haleelay sambabka waxaa loo raacaa si gooni ah xero u gaar ahna waa leeyihiin, halka kuwa caafimaadka qaba la tallaalay .
“Aad ayay muhiim u tahay maxaa yeelay waa wax aannu u baahan nahay, oo waa lacag la’aan, ayuu yiri Aways oo u mahadceliyey dhakhaatiirta fulinaya tallaalkan.
“Dadku hadda waa ay ka warqabeen barnaamijka tallaalka, qof walbana wuxuu raadinayaa in la tallaallo xoolihiisa.” ayuu hadalkiisa raaciyey Aways.
Dr. Saleebaan ayaa Radio Ergo u sheegay in dadku Isticmaali karaan hilibka iyo caanaha riyaha la tallaalay. Ololaha talaalka waxaa taageera Ururka Cuntada iyo Beeraha QM ee FAO.
