Ayax tiro badan ayaa kusoo duulay beeraha iyo dhul daaqsimeedka 22 tuulo oo kuyaala koonfurta degmada Baardheere ee gobolka Gedo oo kamid ah meelihii u danbeeyey gobolada dalka oo uu burbiryey cayayaanka sida xawliga ah u socda ee Ayaxa.
Xasan Cali Xasan wuxuu leeyahay beer ka kooban lix hiktar oo cabirka beeraha ah kuna taala tuuladda Laheley oo 12 KM u jirta degmada Baadheere, halkaasoo hadda loo diyaar garoobayey goosashada waxsoosaarka beeraha, Xasan ayuu Ayaxu ka burburiyey wax soosaarka beertiisa.
“Waxaa ii beernaa Sisin, yaanyo iyo basal. Malaayiin cayayaanka Ayaxa ah ayaa ka yimid xagga sare tanina waxay khalkhal ku abuurtay aagga, ”ayuu yidhi Xasan.
Xasan oo ah aabaha qoys balaaran oo ka kooban laba xaas iyo sagaal caruur ah ayaa ku tiirsan dakhliga kasoo baxa beertiisa, oo ay kujirto bixinta lacagaha iskuulka siddeed ka mid ah carruurtiisa. wuxuu hadda ka welwelsan yahay in qoyskiisa ay soo wajahdo cunto yari iyo in caruurtiisu Iskuulada ka baxaan.
Inkastoo Xasan laga taageeray Abuurka beerta iyo Shiidaalka Cagafta uu wax ku beero hadana wuxuu beertiisa ku maalgeliyey lacag dayn ah si uu ugu hormariyo beertiisa.
“Waxaan soo amaahday lacag aad u badan, qiyaastii $ 6,000, taas oo aan u isticmaali jiray beerista dhulka, soo iibsashada abuur kale oo aan beero iyo kharashka aan siiyo shaqaalaha,” ayuu yiri Xasan.
Gudoomiyaha Ururka Beeraleyda degmada Baardheer Maxamed Cabdiraxiin Gatow ayaa sheegay in Ayaxu burburiyey 847 dhul beereed mudo todobaad gudihiisa kuwaasoo ay kujirto beertiisa.
Maxamed ayaa sheegay in aysan wax caawimaad ah ka helin maamulka degmada, hase ahaatee beeralleyda ayaa sameeyey dadaalo ay iskaga cayrinayaan Ayaxa taasoo ah farsamooyin dabiici ah sida qiiq loo shido, daasado loo garaaco iyo in dad wata oodo isku xiran socod ku maraan dhulka uu ku dego.
“Annaga oo ah ururka beeralayda ah waxaan abaabulnay dadka beeraleyda ah iyo dhalinyarada oo aan isticmaalno waxkasta oo aan ku kaxeyno, dabaa loo shiday, tanagyo ayaa loo qaraacay, ood baa lagu jiday meelkasta oo uu dago ood baa intii la isku soo xir xiro ayaa orad lagu dhex maraa.” ayuu yiri gudoomiyaha beeraleyda Baardheere.”
Isuduwaha wasaarada beeralayda ee maamulka Jubbaland u qaabilsan degamdda Baardheere ee gobolka Geddo ayaa Radio Ergo u sheegay inaysan ka maamul ahaan lahayn awood dhaqaale iyo mid farsamo oo ay kaga hortagaan Ayaxa, Inkastoo uu sheegay in dawlada Federalka ah ee Soomaaliya maamulka gobolka Geddo u balan qaaday 10 haamood oo kuwa Cayayaanka lagu buufiyo ah kuwaasoo loo isticmaali doono degmooyinka Luuq, Doollow iyo Beled-Xaawo oo ahaa deegaanadii ugu horeeyey ee Ayaxu dhibaateeyey.
Arintaas ayaa ka dhigan in beeraleyda Baardheere oo kamid ah kuwii u danbeeyey oo Ayaxu soo gaaro ay sugi doonaan haamaha inta deegaanadii hore wax lagaga qabanayo. Cali Maxamuud Cali oo khabiir ku ah cilmiga beeraha iyo deegaanka, ayaa Radio Ergo u sheegay in Ayaxa hadda deegaanka ku habsadey aan dalka lagu arkin mudo 60 sano ah.
Sida laga soo xigtay Hay’adda cuntada iyo beeraha u qaabilsan qaramada midoobey ee magaceeda loosoo gaabiyo FAO, 70,000 hektar cabirka beeraha ah kuna yaala Soomaaliya iyo Itoobiya ayuu sanadkan baabi’iyey Ayaxa. FAO waxay ka digaysaa in Ayaxu ilaa 500 oo jeer ku dhufan karo dhulalkaasi ilaa bisha June hadaan ka hortag la samayn.
Ayaxu wuxuu soo duulay markii dadku isu diyaarinayaan goosashada wax soo saarka dalagayda ay beerteen xiligii Dayrta oo roobab wanaagsan ka da’een guud ahaan dalka. waxayna kusoo beegantay xili beeraleydu ka rajo qabeen inay kasoo kabtaan abaarihii daba dheeraaday ee dalka ka dhacay.
