(ERGO) – Kun qoys oo ku nool deegaanks Buurguule oo magaalada Mahadaay oo 6km galbeegka uga began ayaa la daalaandhacayo daruuf nolaleed kaddib markii uu Webiga Shabeelle ku fatahay deegaankaas.
Guddoomiyaha tuulada Buurfuule Cabdulaahi Yuusuf Xuseen ayaa Raadiyow u sheegay in ilaa 200 oo qoys ay dulsaar ku yihiin qoysas ku nool dhanka galbeed ee tuulada.
“Muddo 20 cisho ayay biyo halkan ku jiraan, beerahii waa ay baaba’een, bakaarihii ay badarka ku keeydsadeen 9beeralayda) biyahii ayaa xaaqay,” ayuu yiri Cabdulaahi.
Qaar ka mid ah Beeraleeyda oo la hadlay Raadiyow Ergo ayaa sheegaya in iyada oo aan loo diyaar loo ahayn uu webigu ku fatahay tuulada, sidaasna uu qasaaro lixaad leh gaarsiiyay dadka tuulada. Madiino Daa’uud Nuur ayaa ka mid ah dadka guryahooda ka barakacay ee dulsaarka ku ah qeybta kale ee tuulada. Madiina waxaa ay la soo carartay siddeed carruur ah oo ay dhashay iyo aabahoodna oo xanuunsan.
“Afar qol oo jiinqad ah ayay biyaha ku jiraan, habeen iyo maalin biyaha way iska socdaan wabiga ayaan saarannahay, 15 tilaabo ayaan u jirnaa, carruurta raar geedo ah ayaan sariir looga sameeyay, meel aan u shaqo tagno ma naqaan, Buurane iyo Mahadaay ayaa dadka wiilashooda waaweyn yihiin ay u shaqao taqaan, anaga guryaha dushooda ayaan malaay ka soo dabanaa, si carruurta loogu nooleeyo, go’doon ayaan ku jirna,” ayay tiri Madiino. Madiino ayaa sheegtay in ay kjasaartay dalag ay ku abuurtay beer hal higtar.
Dalagyada ay beeraysay waxaa ka mid ahaa galay, sisin, bocor iyo yaanyo, kuwaa oo qarash ahaan ugu fadhiyay $50. Tuulooyinka kale ee ay saameeyeen biyaha waxaa ka mid ah Xudur-ciise, Shiidlo bari, Kulmisweyne, Bayaxaaw, Baardheere, Tuugaaray, Farbaraki, Boodaale, Jameeco, Daymo-same, Xaanoolay, Sanloow, Dhagaxoow iyo Kulmis-yarrow.
Webiga ayaa waxaa uu baabi’iyay beero ku yaalla 43 tuulo oo ka tirsan gobolka Shabeellada dhexe, sida uu sheegaay gudoomiyaha gobalka Shabeelaha-Dhexe, Axmed Meyre Makaaraan
Gudoomiyaha ayaa sheegey in ay tuulooyin badan oo ka tirsan gobalka ay biyuhu ku godoonsan yihiin. Guddoomiyaha ayaa walaac ka muujiyay in uu hakad ku yimaado isu-socodka magaalooyinka Jowhar iyo Muqdisho.
”Dadka dhulbeereedkii waa ka go’ay, biyihii ayay ku dhexjiraan, si dhib leh ayay ku maraan, qaarkood waxay sameysteen fuustooyinka biyaha lagu shubto ee caaga ayey doomo ka sameysteen ay alwaax dhinacyada kaga xiraan oo ay ku gudbaan,” ayuu yiri guddoomiyaha.
Gudoomiyaha ayaa intaas ku daray in ay wadaan gurmadka tabarucaadka oo dadka ku waxyeeloobay magaalada Baladweyne ee gobalka hiiraan wax loogu kala qabanaayo.
