(ERGO) – Fatahaadda webiga Shabeelle ayaa waxaa ay sababtay in 27,471 arday ay ku dhacdo waxbarasho la’aan gudaha magaalada Baladweyne saddexdii todobaad ee ugu danbeeysay. Arrintan ayaa timid kaddib markii siddeetan iyo toddobo xarumo waxbarsho oo ku yaalla magaalada iyo deegaannada kale ee hoos yimaado ay biyaha buuxiyeen.
Guddoomiyaha waxbarashada gobolka Hiiraan Cismaan Maxamuud Cilmi ayaa Raadiyow Ergo u sheegay in dhibbaatada ugu weyn ay wajahayaan ardayda fadhiisan lahayd imtixaanaadka dugsiga sare iyo dhexe ee magaalada. Ardaydan ayaa la filaayaa in galayaan imtixaanadka dowlada Soomaaliya ay qaadeyso sanadka dambe, iyadoo aysan ilaa hadda jirin goob kale oo ardaydu waxbarashada ku sii wadato oo la furay.
“Qoyaska mid kastaa halkii uu is leeyahay waa ku cayman kartaa ayuu u qaxay, xaallad dagnaan ah lagu ma jiro, meel aradayda leeys kugu geeyaa ma jirto, nabad ayay aradayda wax ku bartaan,” ayuu yiri Cismaan.
Xarumahan waxbarasho ee xirmay waxaa ka mid ah 66 iskuul oo ku yaalla magaalada Baladweyne iyo 21 ku yaalla deegaannada kale ee hoosyimado Baladweyne.
Cismaan Sanay Muxumed oo ka mid ah ardaday dhigato fasalka afaraad ee dugsiga sare ee iskuulka Sigma ayaa Raadiyow Ergo u sheegay in fatahaaddu ay saameysay qayb ka mid ah noloshiisa kaddib markii ay biyaha ka qooyeen 4 ka mid ah buugagtii iskuulka.
“Gurigeenii meel kore ayaa buugta ii saarayd, weyna qoyeen, guri labaad ayaan u barakacnay, isagiina biyahaa noogu soo galay, wan ka sii barakacnay guri sadaxaad ayaan iskugu imaanay,” ayuu yiri Cismaan.
Cismaan oo qoyskoodu daganaa xaafadda Xaawo Taako ayaa walaac ka muujiyay in uu si buuxda isugu diyaarin karo istixaanka. Aabbaha dhalay Cismaan oo ganacsade ahaa ayay biyaha ka galeen dukankiisa balse nasiib wanaagsan alaabta dukaanka kama qoyaamin, wuxuuna u gaystay dukaanno saaran meel taag ah.
Axmed Dhaqane Cali waa maamulka iskuulka Sheikh Maxamed Macalin oo ay dhiganaayeen 1080 arday. Iskuulka hadda waxaa maasheeyay biyaha, wuxuuna walaac ka qabaa in ay helaan qarasha ay ku dayactiri karaan iskuulka.
”Biyaha si toos ah oo xoog leh ayay iskuulka u buuxiyeen, banaanadii hadday tahay, musqulahii hadday tahay waa buuxiyen, taasina waxay keenaysaa in wakhti aad u dheer iskuuladu aysan furmin,” ayuu yiri maamulaha Iskuulka Sheikh Maxamed oo ay wax ka dhigaayeen 35 macallin. 392 gaber ayaa iskuulka wax ka barato.
Jaamac Suuley oo ka mid ah barayaasha Iskuulka Mujamacwaxaa wuxuu Raadiyow Ergo u sheegay in xaallada qoyskiisa ay aad u liidato maaddaama dhaqaalihii iskuulka ka soo geli jiray oo ah $200 ay istaagtay. Hadda waxaa ay qoyskiisa ku nool yihiin goob ay u qaxeen kaddib markii ay biyo soo galeen gurigooda.
Shukri Cali Maxamed oo dhigata Mujamac waxaa ay ka mid tahay ixtixaan dugsiga sare gali lahayd balse waxbarashadeeda ayaa hadda hakad gashay kaddib fatahaaddii ku dhufatay magaalada.
Cibaado Cilmiwaxaa ay ka qaxday gurigeeda kaddib markii ay biyo soo galeen. Cibaado seddex carruur ah aya u dhiganaysay fasalka 12aad.
“Maya maya meel wax lagu barto ma jirto dugsiyadii iyo iskuuladii carruurto wax ku baran jirtay biyaha ayaa naga sameeyay oo waa galeen,” ayay tiri Cibaado.
