(ERGO) – Maamulka Puntland ayaa foostooyinka caagga ka samaysan ee biyaha lagu shubto ka mamnuucay deegaannada Puntland. Mamnuucistan oo lagu shaaciyay warsaxaafadeed ka soo baxay madaxtooyada Puntland ayaa waxaa uu ku yimid kaddib codsi ay soo jeedisay Wasaaradda caafimaadka Puntland.
Waxaa ay wasaaraddu sheegtay in ay khatar caafimaad ku yihiin caaggagu nolosha dadka iyo tan duunyada maaddaama lagu keeno waxyaabo kiimikooyin ah sida uu tilmaamayo wasiir ku-xigeenka wasaaradda caafimaadka Puntland Cabdinaasir Yuusuf Xaaji.
“Maaddaama aan foostooyinkan aan loo samayn in biyo lagu shubto oo aashitooyin iyo waxyaabo lagu shubaa badanaa, ganacsatadii inta ay soo qaadaan ayay ka iibinayaan dadkii, waxaa dhacda iyadoo aan sifiican lo nadiifin, ama kiimikadiiba ay dhexgashay ayay dadku biyaha ku shubtaan, arintan waa amar madaxweyne laga ma ganacsan karo lagu mana shuban karo biyo lacabbo,” ayuu yiri wasiirka.
Foostooyin caagaga ah ee biyaha lagu shubto waxaa markooda hore dalalka khaliijka laga keena iyaga oo madhan balse leh qoyaan milan kiimiko ah, qaar kale ayaa lagu keenaa waxyaabo udug ah halka kuwo kalena lagu keeno waxyaabo dareere ah oo ay dadku isticmaalaan sida shambooyinka.
Cabdinuur Sheekh Axmed oo ka mid ah ganacsatada magaalada Garoowe ayaa qaba in la hirgeliyo warshado yaryar si looga maarmo waxyaabaha dhibgta keenaya in la soo dhoofsado.
“Dadka ugu badan ee ay saameynta ku keenayso waa reermiyaga isticmalai jiray, ganacsatadana sidoo kale waa samaeynaysaa, dhib sahlan ma aha, shacabka iyo dowladdu waa isku dan, wadanku warshado ma leh dadkna wax uma keenin waa dhib, foostadu ma beddeli karto waaxaa lagu keenaa shidaal,“ ayuu yiri Cabdinuur
Cabdinaasir Yuusuf Xaaji ayaa sheegay in dowladdan ay ka go’an tahay joojinta waxa kasta dhib ku ah shacabka.
“Dadku waxay isticmaali karaan waxkasta oo biyo lagu keydin karo sida birta macdanta ah oo aan khatar caafimaad keeni Karin,” ayuu yiri Cabdinaasir.
Maxamuud Cali Samatar oo ah khabiir ka faallooda arrimaha deegaanka ayaa Raadiyow Ergo u sheegay in caaggagu waxyaabo sun ah oo laga sameeyay qashin ka soo hadhay warshado.
“Waa waxyaabo aan burburi karin oo ciidda ku milmi karin, waxaa ka mid ah bacaha, jirkaamada, waxayna ka samaysan yihiin sun, waxay saamayn toos ah ku leeyihiin deegaanka dhulka, biyaha, dhirta xoolaha iyo bini’aadankaba, Waxay caagagu si toos ah u dilaan noolaha badda iyo berriga ku nool, sannad kasta nolayaal ayaa la sheegaa in ay u dhintaan waxyaabo suna oo ay cunaan,” ayuu Maxamuud.
