(ERGO) – 6,000 oo qoys ayaa ku barakacay daad ka dhashay roob mahiigaan ah oo ka da’ay magaalada Dhoobley ee gobolka Jubbada Hoose. Roobka ayaa si xooggan uga da’ay magaalada dhowr maalin oo xiriir ah. Madaxa xafiiska ee hay’adda barakaca iyo qaxootiga ee maamul goboleedka Jubbaland Axmednuur Cabdi Muxumed ayaa sheegay in daadku dumiyay ilaa 47 guri iyo 1800 oo suuli. Wuxuu Axmednuur intaa ku daray in roobku saameynta ugu weyn ku yeeshay qoysaska danyarta ah iyo kuwa ku nool xeryaha dadka barakacay oo horey u degganaa guryo nugul.
Xaliimo Deerow Maxamuud iyo carruurteeda ayaa ka mid ah qoysaska daadku barakiciyay ee hadda la nool qoys deggan xaafadaha dhulka sarreeya ku yaal ee Dhoobley. “Gurigii oo dhan biyo ayaa qaaday oo wax raashin ah ama agab iyo gogol ah kama aysan badbaadin,” ayay tiri Xaliimo oo ah hooyo heysta toban carruur ah. Waxa ay intaa ku dartay in daadku uu sidoo kale la tagay bagaash iyo badeecooyin kale oo u yaalay dukaan yar oo guriga uga dhex furnaa. Waxaa ka khasaaray hanti dhan $1500 oo doolar.
Madaxa Xafiiska hay’adda barakaca iyo qaxootiga Axmednuur Cabdi waxa uu sheegay inay kooban tahay awoodda xafiiskiisu ku caawin karo dadka ku barakacay daadka, se waxa uu xusay inay ku jiraan abaabulka hay’adaha gargaarka ee maxaliga ah iyo kuwa caalamiga ah si deg deg wax loogu qabto dadka waxyeeladu gaartay.
Sareedo Salaad Cabdi iyo shanteeda carruurta ah waxay ka mid yihiin 1700 oo qoys oo hadda si ku meel gaar ah u deggan tuulo Ceel-dhiig la yiraa oo ku taal duleedka magaalada. Waxa ay ka mid ahayd qoysaska horey usoo barakacay ee ku noolaa xerada Danwadaagta. Gurigeedii bacaha iyo qoryaha ka sameysnaa roobka ayaa dumiyay. “Saddex habeen ayaan dhex joognay biyaha iyo daadka roobka. Meel aan u baxno iyo meel aan aadno ma heysan. Maanta uun baan halkan soo gaarnay,” ayay tiri Sareedo.
Guddoomiyaha degmada Dhoobley Siyaad Maxamed Xasan ayaa baaq deg deg ah u diray dowladda federaalka ah iyo maamulka Jubbaland oo uu weydiistay inay deg deg ugu soo gurmadaan dadka degmada ee daadku barakiciyay.
