(ERGO) – Nuur Tawane oo 34 jir ah, wuxuu ku jiraa tiro aan badnayn oo ka mid ah dadka qaxootiga ah kuwaas oo ganacsiyo weyn ka sameeyay xeryaha Dhadhaab intii ay joogeen. Wuxuu hirgelyay shirkadda bixisa korontada ugu balaaran ee Xagardheer.
Wuxu ganacsigiisa aad u balaartay toddobadii sano ee ugu dambeeyay, laakiin markii hore wuxuu ku bilawday matoor yar oo dab iftiin ah siinayay 40 qoys taas oo uu hirgeliyay 2006dii. Dhaqaalaha xoogga leh ee uu ka sameeyay tamarta, wuxuu ku sii maal-geliyay warshad yar oo bixisa barafka, mid samaysa saabuunta dharka iyo Iskuul hoose/dhexe oo uu xerada ka furay.
Wuxuu Raadiyow Ergo u Raadiyo Ergo u sheegay in ganacsigiisu uu caawiyo qaxootiga, maaddaama dumar badani ay si dayn ah ku qaataan jalaatada deedna marka ay iibiyaan ay iska soo celiyaan lacagta.
“Haddii Maamadii aroortii Jalaato ay soo qaadeyno meel ay dhiganayso , durbaba waxay samaynaysaa dhaqaale, Ciddii ayay wax soo gelinaysaa, intaasaaba iigaga wanaagsan, sababtoo ah dadka badanaa waxay higsadaan saaka waa baxday, maqribkii maxaa faa’iido ah oo aad soo hoysay. Markaa waxaan ku xisaabasamayaa inta ruux ee aniga korkayga wax ku heshay, qowsna ku maareynayo, intaa iigaga wanaagsan iigagana fadli badan” ayuu yiri Nuur.
Dadka qaxootiga ah waxay bishiiba korontada ku bixiyaan lacag cayiman oo ah qoyskiiba ugu badnaan $12. Nuur Tawane oo dugsiga sare kaga baxay Xagardheer wuxuu Diblooma maamulka ganacsiga ka diyaariyay Ford College. Wuxuu u sheegay in uu la soo shaqeeyay ururo samafal iyo kuwa dhalinyaro, weligiisna uusan mushaarkiisu gaarin $100. Xilligan in ku dhow 30 shaqaale ah ayaa si joogta ah uga hawl-gala ganacsiyadiisa kala duwan.
Wuxuu sheegay in fursadda ganacsigan oo markaas jiray uu ku bilaabay $800 oo ah lacago uu ka aruuriyay mushaaradkii uu qaadan jiray. Tawane wuxuu sheegay in ganacsigiisa tamartu uu si bilaash u caawiyo qoysaska agoonta ah, xarumaha waxbarashada iyo goobaha cibaadada.
“681-qoys ayaan siinayaa yorontada, Tiradaa guud 48- ka mid ahi waa Masaajido oo wax lacag ah kama qaadno, waxaana kale oo siinaa 32-qows oo agoomo ah, waxaan kale oo siinayaa 12-guri oo dhalinyarada Iskuulka hadda akhrista oo guruub,guroob samaysay, dhalinyarada hadda Form 4-samaynaysa oo kale guryo ayaa dhahnaa kireysta, korontada na free ayaan ku siinaa,” ayuu yiri Nuur.
Shirkadda korontada ee uu leeyahay Nuur waxaa hadda yaalla 4-matoor oo nooca korontada ah oo midiiba kuu ku kacay dhaqaale 1800,000-shlilling, oo u dhiganta 18000 doolar. Nuur ayaa walwal ka qabo xaallada cakiran ka taagan xeryaha taa salka ku haysa dib u celinta qaxootiga.
“Qaxootigii haddda waxaan dhahaa oo ugu magac daraa ilgeeryeed buu leeyahay, marka qaxootigii waxay u muuqataa in aan xaaladiisii deganayn, dad faro badani waa laabteen dhalinyaradii ha u badnaadeene, kuwo kale iyagana waa sii socdaan, markaa ganacsiga aan meesha ku hayno na mid maanta iyo beri lagu qaadi karo maaha, markaa waxaa samaynayna qorshe oo aan meelo kale aan hantida ku geysan lahayn,” ayuu yiri Nuur oo ku hammi dheer marna ka burburin hal abuurkiisa ganacsi.
