(ERGO) – Lix jaaamacadood oo ku kala yaalla magaalooyinka Muqdisho iyo Baledweyne ayaa deeqo waxbarasho siiyay 350 arday oo sannadkan ka soo baxay dugsiyada sare ee magaalada Baledweyne kuwaas oo aanan awoodin in ay iska bixiyaan qarash jaamacadaha oo waxbarashada ka hari lahaa.
Jaamacadda Joobkey qaybteeda Beledweyne waxaa ay waxbarsho bilaash ah siisay 100 arday, Jaamacadda Hiiraan, iyana waxay waxbarsho bilaash ah siisay 50 arday.
Waxaa sidoo kale iyana waxbarsho bilaash ah 38 Jaamacadda Centre, halka Jaamacadaha Plasma, Baladweyne iyo Yarmuuk oo ku taalla Muqdisho ay waxbarasho bilaash ah kala siiyeen 21, 5, iyo 136 arday.
Madaxa wabarashada Jaamacadda Hiiraan, Cabdulaahi Cabdisalaan Cilmi ayaa Raadiyo Ergo u sheegay inwaxbarashadaan bilaashka ah ay ugu talagaleen dadka danta ayar, iyo dumarka.
”Markii la yiraahdo deeqaha waxbarashada magaca ayaa ka dareeme kartaa dad fara badan ayaa lagu kala soo xuli karaa, inta badan waxaa lagu kala xushaa in ardaygu yahay mid ka soo jeeda qoys dan yar ah iyo uu kaalin hore ka galay natiijooyinka imtixaanaadka la qaaday,” ayuu yiri Cabdulaahi. Sida uu sheegay Cabdulaahi, 30 ka mid ardayda ay qaateen waa gabdho.
Maxamed Ibraahin Xasan waa 23 sano jir ah ka mid ah ardayda ka faa’iidaysanaysa deeqdan waxbarasho ee ay bixiyeen Hiiraan University.
Wuxuu sanadkan ka baxay dugsiga sare ee Mujamac. Maxamed oo ka soo jeedo qoys danyar oo aan awoodin qarashaadka ku baxayo jaamacadda.
Inta uusan helen deeqda waxaa uu tagay mid ka mid ah jaamacadaha waxaa loo sharxay qarashaadka ku baxayo jaamacadda isagoo garawsaday inuu is kaga haro jaamacadaha sanadkan inta uu dhaqaale ka helayo laakiin waxaa uu maqlay in Xafiiska ururka Horumarinta Ardayada gobolka Hiiraan ay hayaan deeqo waxbarasho oo la’aan ah.
Maxamed waxaa uu waxbarashada qeybta hoose iyo dhaxe si lacag la’aan ah uga dhigtay iskuulka Daryeel-bulsho oo ah iskuul si bilaash ah wax loogu baro ardayda
”Wan ku faraxsannahay walaahi markaan helay deeqdan waxbarasho waalidkane wey farxeen markan u sheegay in la iga xaliyey caqabada igu taagnayd, runtii isma dhahayn inaan helayo deeq waxbarasho oo lacag la’aan” ayuu yiri Maxamed.
Sacdiyo Ciise Aadan oo ka baxday iskuulka Adult ee magaalada Baledweyne waxay Raadiyo Ergo u sheegtay in aysan awoodin qoyskooda dhaqaalaha ku baxaya jaamacadda.
Aabbaheed waa nin da’ ah waxaana nolosha qoyskoodu ay ku tiirsan tahay dhaqaale ay hooyadeed ka hesho bagaash ay magaalada ku iibiso.
Hadda waxaa ay ka mid noqotay ardayda waxbarashada bilaashka ah ka heshay.
”Rajo saa’id ah kama qabin aniga in aan bilaabayo Jaamacad sanadkan, aniga deeq waxbarasho in ay jirto ma ogayn, dib ayaa la iga soo sheegay markan ogaaday sidaasi ayaan kula soo xareeray markan helayna, waan farxay al-xamdulilaah waxaana jeclahay in aan barto kuliyada beeraha oo ilaa yaraanteeydii aan ku hamin jirtay.
Arday lagu qiyaasay 1,468 arday ayaa ka baxday sanadkan iskuullada dugsiyada sare ee ku yaalla Gobolka Hiiraan waxaana jira boqolaal arday oo aanan awoodin in aysan iska bixiyaan qarashaadka jaamacadaha kuwaas oo sannad walba ka haro waxbarashada sida uu sheegay guddoomiyaha waxbarashada gobolka Hiiraan.
