(ERGO) – Ganastada degmada Matabaan ayaa ka faaiidaysanaya nalalka cadceedda ku shaqeeya oo lagu xirray waddooyinka magaalada bishii la soo dhaafay dhamaadkeeda.
Marka laga soo tago bilicda magaalada iyo ammaanka oo ay qayb ka qaadanayaan haddana waxaa jira dukaamo iyo maqaayado ku yaala magaalada kuwaa oo xilligii magaalada aanu nalalkan ka jirin la xiri jiray maqribkii balse hadda u shaqeeya habeen iyo maalinba si isku mid ah.
Wiilo Xasan Cabdi oo haysato siddeed carruur waxaa ay leedahay dukaan lagu iibiyo raashin iyo maqaayad raashinka bisil lagu gado. Ka hor inta aanan nalalka lagu xirrin degmada waxay labadeeda goobood xiri jirtay salaadda maqrib ka dib balse hadda maqaayadeeda ayaa shaqaysa in ka badan 18 saacadood.
Waxaa ay Raadiyow Ergo u sheegtay in xilliyada habeenkii ah ay wax ka gadato rakaabka gawaarida safarka ah ee isaga kala goosha magaalada Muqdisho iyo magaalooyinka ku kalgobollada Bari iyo Woqooyi.
“Markii hore wax yar ayaan shaqeeyn jiray, haddase dhaqaalo fiican ayaan xareeysanaa seddax boqol ilaa afar boqol oo doolar labada dukaan ayaan ka xareeysanaa. Markii hore 50 doolar ayaan shaqeyn jiray haddase habeenkii shaah kari, cuno kari ayaan ku jira,” ayay tiri wiilo oo hadda ka faa’iidaystay.
Salaad Cilmi Diiriye waa dukaanle wuxuu ganacsigiisa hadda shaqeeyaa ilaa 12ka habeennimo taa oo uu sheegay in ay kobcisay ganacsigiisa.
“Awal waddooyinku mugdi ayey ahaayeen oo cidna waxba nooma soo doonan jirin, awal soddon ilaa afartan meelahaas ayaan ka faaiidi jirnay, haddase lixdan dolar, toddobaatan ayaa naga soo gasha” ayuu yiri Salaad.
In ka badan boqol solar cadceed ayuu maamulka Matabaan codsaday sida uu sheegay guddoomiye ku xigeenka dagmada Matabaan, Cabdullaahi Cumar Xaanshi, waxaana ilaa hadda soo gaartay 25 xabo oo lagu xiray waddooyinka muhiimka ee magaalada kuwaa oo ay ku caawisay Hay’adda IOM.
Soolarada waxaa ay xiliyeen markii la keenay oo la xiray in mugdii laga baxo oo uu ganacsi kobco isla markaana la heli iftiin, boqol kiiba boqol dadkii ganacsinayay ama xaggii amniga iyo isku socodkii ganacsiga wax badan oo ifteen ah ayaa laga helay,” ayuu yiri gudoomiye ku xigeenka degmada.
Marka laga tago goobaha hadda layrarka leh, waxa uu guddoomiyaha sheegay in goobihii looga baahnaa layrarka ay wali mugdi yihiin isla markaana codsigoodu sidii u jiro.
‘’Goobihii muhiimka wali sidii ayey u nal la’yihiin sida goobaha waxbrashada, Iskuulada, isbitaalka, suuqa, xaafadaha, ceelasha iyo xarumaha maamulka dhamaan sidii hore ayey u nal la’ yihiin
