(ERGO) – Seddax boqol oo qof oo ku nool deegaanka Ceeldibir oo Gaalkacayo koonfurta uga beegan qiyaastii 180-km ayuu cudurka shuban-biyoodka soo ritay, sida uu Raadiyow Ergo u xaqiijiyay Dr Maxamed Cali Kaahiye.
Laba carruur ah oo kala ah wiil 7 jir ah iyo gabar 4 jir ayaa cudurka geeriyood bilowgii isbuucii hore.
Dr. Maxamed oo ka howl-galo Isbitaalka guud ee Galkayo ayaa Raadiyow Ergo u sheegay in sababta uu cudurka u dilaacay ay tahay ah kuleel baahsan oo deegaanka ka jira iyo dadka deegaanka oo aan haysan biyo nadiif ah.
Dadka deegaanka ayaa biyo ka caba ceelal gacmeedyo gaagaaban iyo barkado oo aysan nadaafadooda fiicnayd.
Dr. Maxamed ayaa intaa ku daray in kiisas kale oo la xiriira shuban-yoodka in wali laga soo sheegayo deegaankaas.
Dadka uu xanuunkaas uu soo ritay waxay iskugu jiraan dadka reer guuraga ah iyo kuwa degan tuulada.
Dr Maxamed ayaa xusay in tuulada aysan lahayn xarun caafimad oo xamilu karto tirada intaas laeg ee bukaanada.
Wuxuu sheegay in 180 ka mid ah seddexda boqol ee xanuunku ay yihiin carruur halka inta kale yihiin dad waaweyn.
“Meesha marka aan tagnay, wax yaabaha ugu darnaa ee aan aragnay waa deegaanka oo aanan lahayn wax xarun caafimad ah. Waxaan kale oo aan aragnay bukaan aad u farabadan oo 300 kor u dhaafaya,” ayuu Dr Maxamed oo ka mid ahaa guddi booqday tuulada.
Wuxuu sidoo kale sheegay in 8 qof oo ay xaaladooda adag tahay loo Soo gudbiyay magaalada Gaalkacyo.
Cabdulqaadir Mohamed Guuleed oo ah aabbaha qoys ka kooban 8 qof wuxuu cudurku ku waayay wiil yar oo ah 7 sano jir ah.
Waxa uu sheegay in 7 maalmood cudurku uu hayay inanka yar balse maalintii siddeedad uu geeriyooday.
“Waxaan marka hore ku arkay wiilka shuban. Waxaan kale oo aan ku arkay qandho xad dhaaf ah. Deegaanka dhaqtar baaro ma joogo. waxaan kale oo aan ku arkay in tabar dhan uusan cunuga lahayn,” ayuu yiri Cabdiqaadir.
Cabdiqaadir ayaa xusay in dhowr jeer uu isku dayay in ay uu helo gaadiid uu Gaalkacyo ku gayso caruurtiisa, balse qarashka gaadiid oo lagu qayaaso lacag dhan $300 ay ku kaliftay in uu guri ku haayo wiilka yar.
Cabdiraxmaan Cali Axmed oo farmashi ku heysto deegaanka muddo 6 sano ah wuxuu bartay kalkaalinimo iyo cudurada.
Wuxuu Raadiyow Radio Ergo u sheegtay in maalinkii ay qaabilaan dad ku dhow 10 qof oo cudurku uu soo rito, isagoo intaa ku dartay in tiradu ay sii kordhayso.
“Waan qiimeeya marka hore qofka, kadib waxaan siiyaa wixii uu u qalmo haddii tabar la’aan heyso waxaan siiyaa faleembo, haddii aan wax ka qaban waayo, waxaan u diraa Gaalkacyo,” ayuu yiri Cabdiraxmaan.
Labadii todobaad ee la soo dhaafay ayuu sheegay in ka badan 60 qof in uu qaabilay ku waasi oo xanuunka la’ ildarnaa.
Sacdiyo Maxamuud Cali waa hooyo qoys 11 qof ka kooban.
labo ka tiraan carruurteed oo Kala jira 12 iyo 3 jir ah ayuu xanuunku ka hayaa mudo 4 maalin ah.
Mudada xanuunka shubanka uu ka hayo carruurta Sacdiyo waxa ay maalin walba faleenbo $5 doller qiimaheedu yahay uga soo qaadaysay farmashiga deegaanka ku yaala.
“Isbitaal malihin, gaarina malihin. Wax kale awood uma lihin, waxaan cunaga hadda daawo u ah farmashigaas yarka ah. Wixii aan ka soo helno oo waliba lacag nagala sii qaado ayaan siinaa,” ayay tiri Sacdiyo.
