Labo arday oo ka baxay kulliyadaha beeraha iyo xoolaha ee jaamacadda Jasiira ee magaalada Muqdisho ayaa tababar caws beeris ah u sameeya xoolo-dhaqatada ku nool Guriceel.
Waxay adeegsadaan hab ay maseggada u beerayaan iyagoon carro adeegsan, dhulkana aan ku beerin, si cawkeeda uu calaf ugu noqdo xoolaha.
Ardaydaan ayaa adeegsada weel shaqab ah, bac iyo biyo ay ku waraabiyaan masaggada marka ay beeraan. Cawskaas ayaa marka uu soo dhasho kaddib u baahan in la waraabiyo lixdii saacadoodba mar.
Ilaa marki ay billaabeen in tababarkaan ay siiyaan xoolo-dhaqatada waxaa ardaydaan ka baxay lacag dhan $100 oo ay iyaga isku dareen, waxayna dadka wax u barayaan si bilaasha ah.
Ujeeddada ayaa ah in xoolaha xilliyada jiilaalka ama abaaraha ay dhacaan aysan waayin calaf ay ku noolaadaan.
Anfac Yuusuf, oo ah mid ka mid ah labadaas arday ayaa u warrantay Fowsiya Cumar Barre oo ka tirsan Raadiyo Ergo.
