(ERGO) – Shan boqol oo carruur ah ayaa labadii bilood ee u dambeysay ku biiray dugsiga hoose/dhexe ee deegaanka Kala-bayr oo ka tirsan degmada Laascaanood ee gobolka Sool, sida uu Raadiyo Ergo u sheegay maamulaha dugsigaas Cabdiqaadir Jaamac Faarax.
Dugsiga waxaa horay wax uga baran jiray 739 arday oo isugu jira wiilal iyo gabdho. Carruurta hadda ku biiray dugsiga waxay ka soo jeedaan qoysaska ku soo barakacay colaad ka dhacday deegaanno ka tirsan koonfurta gobolka Sool.
Halkii fasal oo markii hore ay fariisan jireen 40 arday, hadda waxaa fariista 70 arday. Cabdiqaadir ayaa sheegay in ardayda iyo macallimiintuba ay caqabad ku tahay tiro badnaanta ardayda iyo ciriiriga ka jiro fasallada.
Iskuulka waa lix fasal, waxaana ardayda wax bara sagaal macallin.
“Ardaydii qaar ayaa dhulka fariista, kursigiba lix arday ayaa ku fariista. Macallimiinta xataa ardaydu way ku fara bateen oo labada gelinba way shaqeeyaan,” ayuu yiri maamulaha.
Waalidiinta soo barakacay ee carruurtooda geeyay dugsigaan waxaa ka mid ah Sahro Maxamuud Faarax oo ah hooyada toban carruur ah. Toddobo ka tirsan carruurteeda ayay markii ugu horreysay fursad waxbarasho oo bilaash ah u heshay.
Qoyska Sahro waxay ka soo barakaceen colaad ka dhacday deegaanka Dharkeyn, waxayna hadda dul saar ku yihiin qoys ay qaraabo yihiin oo deggan Kala-bayr, kuwaas oo ku caawiyay hal qol oo ay ku hoydaa iyada carruurteeda.
In kastoo Sahro carruurteeda ay fursad waxbarasho heleen, waxaa jiro carruur badan oo aan fursaddan helin markii la keenay iskuulka.
Labo boqol oo carruur ah oo waalidiintood ay codsadeen inay waxbarashada ku biiriyaan ayaa dib loo celiyay markii loo waayay meel ay wax ku bartaan.
Waalidiintaas carruurta lala celiyay waxaa ka mid ah Farxaan Cali Jaamac oo ah aabbaha lix carruur ah, oo afar ka tirsan ay wax u baran jireen ka hor iuntuusan colaadda uga soo barakicin deegaankiisa Dhumay.
Hadda carruurtiisa ma haystaan waxbarasho, waxayna iska joogaan halka ay barakaca ku yihiin.
Farxaan wuxuu ahaa ganacsade intuusan soo barakicin, wuxuuna Raadiyo Ergo u sheegay in hadda uu quud darreynayo inuu dib ganacsigiisii uga billaabo deegaanka Kala-bayr haddii uu dhaqaale helo. Nolosha qoyskiisa waxay ku tiirsan tahay biil ay u soo diraan dad eheladiisa ah.
Maamulaha dugsiga hoose/dhexe ee Kala-bayr ayaa Raadiyo Ergo u sheegay in colaadda ka jirta koonfurta Sool ay ku xirmay shan iskuul oo ku yaallay deegaannada Dhumay, Dharkeyn iyo Daba-taag. Dugsiyadaas xirmay waxa aku waxbarasho beelay kun iyo shan boqol oo arday, kuwaas oo qoysaskooda ay u kala barakaceen deegaanno kala duwan.
Dugsiyadaas waxaa hir geliyay ganacsato isu tagay oo maal-gelin sameeyay.
