Dhalinyaro wax ka barata jaamacadda magaalada Ceerigaabo iyo kuwa dhigta dugsiyada sare, ayaa maalin kasta oo jimco ah waxay adeeg khudrad ah iyo lacag dhan US $10 ay toddobaad isticmaalaan gaadhsiiyaan qoysaska soo barakacay.
Taageeradan waxaa toddobaadkiiba mar la siiyaa qoysaska soo barakacay iyo kuwa danta yar ee magaalada. Hawshan waxey dhalin yaradan soo wadeen saddexdii bilood ee ugu danbeysay.
Xaliimo Cabdullaahi, ayaa toddobaadkan waxaa la guddoon siiyey lacag ay cunto ku iibsato iyo khudaar, taasoo ay siiyeen dhalinyaro is abaabushay oo kunool Ceeri Gaabo.
Xaliimo waa hooyo haysata shan carruur ah oo labo gabdho yihiin, waxey kamid tahay dadka danta yar ee Ceerigaabo.
“Saaka waxay ii keeneen khudrad kala duwan, 3 kiilo oo baradho ah, 2 kiilo oo basal ah, kiilo tamaandho ah, iyo adeeg kale, iyo lacag cadaana.
Asbuucii waxa igu baxa adeeg $4 dollar, raashiin kana marka lagu daro waa 60 kun ilaa 70kun Sh Somali land ah, una dhiganta ($6), adeegan iyo lacagtan waa mid nagu filan toddobaad”, ayey tiri Xaliimo.
Xaliimo, waxey kasoo barakacday baadiyaha Ceerigaabo, iyadoo wiilka curadka u ah carruurteeda uu yahay mid qaba cudurka dhimirka.
Waxey sheegtay iney tahay qof aan shaqeyn, oo la joogto qoys ay qaraabo yihiin, waxay Raadiyo Ergo u sheegtay in gargaarkan uu ku filan yahay toddobaad.
Dhalinyardan oo ah kuwo iskood isu abaabuley, ayaa leh guddi gaar ah oo soo xula qoyska ay toddobaadkaas gargaarka gaadhsiinayaan, waxay la tashi la sameeyaan guddoomiyeyaasha xaafadaha magaalada Ceerigaabo.
Jaamac Xuseen Saalax guddoomiyaha dhalinyaradan, ayaa Raadiyo Ergo u sheegay inay la kulmeen qoysas aan haysan nolol maalmeed, taasna ay keentay inay howshan u istaagaan.
Guddoomiyaha ayaa sheegay inay mararka qaar kaalmo ka helaan culumaa’udiinka dhalinyarada ee kunool magaalada, laakiin aaney jirin cid kale oo dhaqaale siisa.
Kiilada burka, bariiska iyo sonkorta ayaa lagu iibiyaa US $1 Ceerigaabo.
Kharashaadkan dhalinyaradu waxay ka bixiyaan jeebkooda, hase yeeshee waxay la kulmaan caqabado, sida uu Raadiyo Ergo u sheegay Jaamac Xuseen.
“Marka aad subixii kallahdo oo adeeg doonto, waxaa lagu dhahayaa dadkaa is tuseysaan, oo wax ku filan oo deeqa ma siin kartaan, oo way na niyad jabiyaan, sidaas waxaa na dhaha dadka qaarkood, halka ay jiraan kuwo noo mahad celiyo, oo ugu yaraan hadaanay wax na siineyn, aan na carqaladeyn”.
Barnaamijkan dhalinyaradu waxey ku magacaabeen “Caawi qoys tabaaleysan”, iyagoo hiigsanaya iney balaariyaan haddii awoodda u saamaxdo.
Dhalinyaradan is abaabushay ayaa ka kooban 17 qof oo 5 gabdho yihiin, waxay rajadoodu tahay inay gargaarkan jimcaha gaadhsiiyaan dhammaan deegaanada gobolka Sanaag.
