Qaxootiga Soomaalida ee ku nool dalka Yemen, ayaa wajahayo duruufo cunno iyo hoy, oo ay ka dambeysay markii raashinkii gargaarka ee ay heli jireen la dhimay sababo la xiriira dagaalka sokeeye ee muddada saddexda sano ka socda dalkaas.
Dagaallada ayaa saameyn ku yeeshay dekedihii dalka ee uu gargaarka ka soo degi jiray, waxayna taas keentay in kaalmadu yaraato oo raashinkii yaraa ee dalka yaallay loo qeybiya qaxootiga iyo dadka Yemen u dhashay ee gudaha dalkooda ku barakacay.
Cabdiqaadir Maxamed Nuuradiin oo ah aabaha saddex carruur ah, wuxuu ku nool yahay magaalada caasimadda ah ee Sanca, isagoo dhawaan ka soo barakacay magaalada kale ee Cadan. Qoyskiisu waxay hadda nolol ahaan ku tiirsan yihiin dhaqaale aan badneyn uu ka soo urursaday shaqo nadaafad meel xafiis ah oo uu ka shaqeynayey ka hor intii uusan ka soo barakicin Cadan
Wax shaqo ah oo uu hadda hayo ma jirto, marar badan oo uu isku dayey in uu shaqo raadsado, wuu ku guuldareystay, iyadoo loo shaqeeyeyaasha ay u diideen in ay shaqo siiyan, taasoo uu kala siman yahay Soomaalida kale ee Yemen ku nool.
“Shaqo nalama siiyo, iyadoo qof Yemeni ah joogo. Soomaalida waxay leeyihiin waa tuugo. Qof walba wuxuu isku dayayaa inuu shaqo helo, cid siineysana malahan”.
Dhibaatada ku heysato Yemen awgeed, wuxuu ka door-bidi lahaa Cabdiqaadir in uu Soomaaliya oo ay ugu dambeysay 26 sano dib ugu laabto.
“Berri diyaarad ayaa taagan dadka qaadeysa haddii la i dhihi lahaa waa raaci lahaa, meeshaan wax lagu hayo malaha”.
Hay’adda Qaramada Midoobey ee qaxootiga, UNHCR, oo qaxootiga siisa raashinka gargaarka ah ayaa dhintay mucaawinnada, taasoo keentay in gargaarku ku filnaan waaya qaxootiga sida uu Raadiyo Ergo u sheegay, guddoomiyaha xerada qaxootiga Alkharaz, Cabdiqaadir.
Shaash ayaa sheegay in xerada aysan ka jirin adeegyada bulshada ee aas-aasiga ah, sida biyaha iyo caafimaadka, laakiin wali adeegga waxbarashada la heli karo oo ay iskuulladu furan yihiin.
Qunsuliyadda Soomaalida ee Yemen, ayuu xusay in ay gaarsiiyaan codsi ka yimid qaar kamid ah qaxootiga oo ay ku dalbanayeen in dalkooda lagu celiyo, hase yeeshee wali wax jawaab ah kama aysan helin.
Xaaladda nolosha oo ku adag awgeed, waxay qaxooti badan ku khasabtay in ay waddooyinka ka dawarsadaan. Waxaa kamid ah dadkaas Faadumo Baashe Cabdillahi, oo ah 42-jir heysato afar carruur ah. Waxay sheegtay in si ay u hesho wax ay siiso carruurteeda ay ka dawarsato magaalada Sanca.
Kuma filna qoyskeeda raashin dhan 12 kiilo oo bur ah oo labadii bilba mar ay hesho, mana jiro meel kale oo daqli ka soo gala.
Hay’adaha samafalka ayaa toddobaadyadii la soo dhaafay ka dalbaday kooxaha dagaallamayo Yemen in ay dekedaha dalka u furaan gargaarka bani’aadanimo, si loo gaarsiiyo qaxootiga iyo dadka ku barakacay gudaha dalka.
Qaramada Midoobey ayaa ka digeysa suurtagalnimada macquul ka dillaacda Yemen, oo saameyn karta malaayiin dadka waddankaas.
