(Ergo) – Wacyigelin dhinaca waxbarashada ah, oo laga sameeyey deegaanka Magaalo-cad oo 6km u jira magaalada Berbera ayaa dhaliyey in arday badan ay iska qoraan dugsiga hoose/dhexe oo si bilaash ah wax looga barta, kaasoo deegaanka laga furay September, 2018.
Wacyigelinta oo billaabatay bishii October, socotayna saddex toddobaad, ayaa waxaa si wadajir ah u fuliyey waaxda waxbarashada ee dowlada hoose ee Berbera, wasaaradda waxbarashada Somaliland iyo hay’adda SOS ee ka shaqeysa waxbarashada. Waxay keentay in 82 arday oo cusub ay dugsiga Magaalo-cad ay ku biiraan. Horay waxaa iskuulka u dhiganayey 36 arday, waxayna tirade ku biirtay ka dhigtay in hadda ay iskuulka wax ka bartaan 118 arday.
Deegaanka oo ay ku nool yihiin dad xoolo-dhaqato ah, ayaa qaar badan oo kamid ah carruurta waxbarashada gaartay aysan u suurtagelin in ay iskuullada aadaan, iyadoo qoysaskooda ay marba meesha daaq iyo biyo laga sheego ula guuraan xoolaha.
Ayaanle Axmed Maxamed, madaxa qeybta wacyi-gelinta waxbarashada ee ha’yadda SOS oo dhistay dugsigan ayaa sheegay in 500 oo carruur waxbarashada gaartay ay Magaalo-cad ku nool yihiin, ayna wax kasta sameeyeen si looga mira-dhaliyo ololahooda.
“Waxbarashadu waa muhiim. Tuulo intaas oo carruur ah ay ku nooshahay oo aanay waxba baraneyn waa dhibaato. Markii la arkay tirada carruurta ee halkan ku nool ayaa la go’aansaday in dugsiga loo dhiso” ayuu yiri Ayaanle.
Aamina Maxamuud Ismaaciil, oo kamid ah dadka ku nool Magaalo-cad, ayaa afar carruur ah oo u gaaray da’da waxbarashada ay geysay dugsiga wacyigalinta kaddib. Waxay u sheegtay Raadiyo Ergo in markii hore ay carruurta raaci jireen 76 neef oo ari ah oo qoyskoodu leeyahay.
“Guriga ayaa la iigu yimid. Dugsiga ayaa kulamo aan ku galnay, waan qaadannay talooyinka ay na siiyeen maamulka dugsiga iyo dadka kale ee wacyigalinta la waday”, ayey tiri Aamina.
Waxbarashada dugsigan waxaa sidoo kale loogu talogalay in ay ka faa’ideystaan ardayda saddex deegaan oo kale oo u dhow Magaalo-cad. Wacyigelinta kaddib 21 arday ayaa isku dardar deegaannadaas uga soo biirtay iskuulka, sida uu Raadiyo Ergo u xaqiijiyey Aadan Maxamed Cumar oo kamid ahaa guddi deegaanka ah oo loo sameeyay sidii ay carruurtooda u keeni lahaayeen dugsiga.
Dugsiga Magaalo-cad, waxaa u dhammeystiran qalabka waxbarashada sida buuggaagtii, casharada laga dhigayay, sabbuuradihii iyo agab kale. Waxaa uu ka kooban yahay siddeed fasal, macallimiinta wax ka dhigayana waxaa mushaarkooda bixinaya dowlada hoose ee Berbera.
Isku-duwaha wasaaradda waxbarashada Somaliland ee gobolka Saaxil, Ibraahim Digaale ayaa sheegay in dugsigan ay ku dareen kuwa dowladda oo ay maamulkiisa la wareegeen.
“Waxaanu u sheegaynay in reerkii saddex carruur ah heysta ay labo keenaan marka hore si ay kan kale ay wax ugu dirsadaan. Arrintaasi way naga aqbaleen bulshadu. Hadda waxbarashadu inaanay ka istaagin ayaan ku han-weynahay, in uu noqdo dugsi dad aqoon leh ka soo baxaan”.
Ibraahim Digaale ayaa tilmaamay in ay sii wadi doonaan wacyigelinta, ayna rajeynayaan in shan bilood gudahooda ay tiro ka badan kuwa hadda dhigta iska qori doonaan dugsiga Magaalo-cad.
