(ERGO) – Kow iyo toban carruur ahaa ayaa geeriyootay in ka badan afartan kalena way la xanuunsan yihiin, kaddib markii ay ku dhacday jadeeco shanti toddobaad ee u dambeysay ka jirtay deegaanno ka tirsan gobolka Shabeellaha dhexe.
Sida laga soo xigtay hay’adda Intersos oo maamusha isbitaalka degmada Jowhar iyo sidoo kale dhowr xarumo caafimaad oo ku yaalla meelo gobolka ka tirsan, qoysas badan oo ku nool tuulooyin kala duwan ayay saameysay jadeecada oo dillaacday 20-kii bishii Sebtembar ee la soo dhaafay.
Kiisaskii u horreeyay ee jadeecada ayaa lagu arkay tuulooyinka Dhaafo oo ka tirsan Mahadaay iyo Buurane oo Jowhar ka tirsan.
Dr. Cabdiraxmaan Cali Cabdiraxmaan oo ah agaasimaha isbitaalka Intersos ayaa xaqiijiyay dhimashada kow iyo tobanka carruurta ahaa, wuxuu intaas ku daray in kuwo kale ay aad ugu nugul yihiin geeri ama naafonimo waarta oo ay ka dhaxlaan heerarka tallaalka oo hooseeya.
“Marki u dambeysay ee olole tallaal laga sameeyo tuulooyinkaas waxay ahayd 2017,” ayuu yiri Dr. Cabdiraxmaan. “Carruurta ugu badan ee jadeecadu saameysay waa kuwo aan helin tallaalka, sababtoo ah waalidiintood ayaan fahamsaneen muhiimaddiisa,” ayuu hadalkiisa sii raaciyay.
Jacfar Jimcaale Mahad waa aabbaha toddobo carruur ah oo ku nool tuulada Dhaafo, wuxuu Raadiyo Ergo u sheegay in saddex carruurtiisa ka tirsan oo kala ah gabar iyo labo wiil ay ku dhacday jadeecada.
Wuxuu daawo dhaqameed ahaan u adeegsanayay geedka Mareerka la yiraahdo si uu udaweeyo carruurtiisa.
Wuxuu sheegay in labada wiil ay ka bogsadeen cudurka maalmo kaddib, laakiin xaaladda gabadhiisa ay ka sii dartay ilaa ay indho la’aan noqotay.
“Waxaan isticmaaleynay Mareer si aan u daweyno carruurta, wiilashu aad bay u caafimaadeen laakiin gabadha waxay xanuunsaneyd 22 maalmood. Mar dambe ayaan ogaannay in gabadhu aanay waxba arki karin, waxaan u qaadnay isbitaalka, waxayna dhakhaatiirtu noo xaqiijiyeen inay beeshay isha midig,” ayuu yiri Jacfar.
Aadan Muuse waa 41 jir ku nool tuulada Buurane oo 20 km u jirta degmada Jowhar, waxaa cudurka jadeecada uga geeriyootay gabar uu dhalay oo jirtay siddeed bilood. Afar ka tirsan carruurtiisa ayay ku dhacday jadeecada.
“Gabar ayaa cudurka iiga geeriyootay, saddex ayaa hadda bogsootay. Ma laha xarun caafimaad tuuladeenna, wayna adag tahay in la helo wax daawo ah haddii uu qof xanuunsado,” ayuu yiri Aadan.
Madiina Cismaan Dugow oo iyaduna ku nool tuulada Dhaafo ayay jadeecada ka dishay gabar ay dhashay oo afar sano jir ahayd. Waxay sheegtay in dhimashada gabadheeda ay sabab u tahay tallaal la’aan.
“Shan carruur ah ayay iiga dhacday jadeecada, afar horay loo tallaalay durbaba way caafimaadeen, laakiin gabadha oo aan weligeed la tallaalin ayaa u dhimatay cudurka,” ayay hooyo Madiino u sheegtay Raadiyo Ergo.
