(ERGO) – Roobab xoog leh oo horraantii bishan Juun ka da’ay buuraleyda iyo dhulka banaan ee gobolka Bari ayaa waxyeelo u geystay dalagyadii boqollaal beerood oo halkaas ku yaalla. Daadadka ayaa sidoo kale qaaday qalabii ay beerallaydu ku shaqaysanayeen. Khasaaraha xooggiisa ayaa soo gaaray dhulka beeraha ku haboon eek u yaalla Carmo, Qow, Meeladeen iyo Ufayn, sida ay sheegtay wasiir ku-xigeenka wasaaradda beeraha Puntland Siciido Xuseen Cali.
Beerahaas ayaa daadad xoog leh oo ka dhashay roobab ka da’ay buuralayda labadii bisha Juun ku soo celiyeen. Beerallayda ayaan xilli hore helin digniin, ma jirin diyaar gorow ku filan oo ay sameeyeen kahor roobabka.
Mubaarak Ibraahim oo 40 jir ah, isaga iyo qoyskiisu waxay ka mid yihiin 170 qoys oo beellay ah oo soo wajahday barkac iyo dhaqaale burbur. Beer hal hiktar ah oo uu matoor ku waraabin jiray oo ku taalla deegaanka Barookhle oo 17 km u jirta degmada Carmo, isla markaana ay ku tiirsanayd nolosha qoyskiisu, ayaa ku burburtay daadadka ka dashay roobka.
Wuxuu Raadiyo Ergo u sheegay in ay u barakaceen dhul bannaan ah oo aan sidaas uga sii fogayn halka ay beerta ku leeyihiin, isla markaana aanay xilligan haysan hoy iyo cunto ku filan, inkasta oo ay taageero raashin u badan ay ka heleen qoyskooda oo deggan magaalada Carmo.
Beerta oo uu aabihiis ka dhaxlay ayuu sheegay inay ugu beernaayeen xilligii daadku qaadayay geed mirood ay timirtu ka mid tahay iyo qudaartii kale, sida yaanyada, basasha iyo liin-dhannaanta. Ceelkii uu ka waraabin jiray beerta ayuu sidoo kale sheegay inay biyuhu awdeen. Shan neef oo ari ah ayuu sheegay inay uga bad baadeen biyaha.
Maxamed Faarax Ismaaciil, wuxuu kamid yahay beerallayda ay dhibaatadu ka soo gaartay roobabkii Guga. In kabadan 100 beerood ayay daadadkii ka dhashay roobabka ay qaadeen dhammaan dalagyadii ku beernaa. Maxamed waxaa biyuhu kala tageen abuur iyo agabka beeraha looga shaqeeyo oo uu sheegay in ay ugu kacday lacag dhan $5,000. Lacagta iyo abuurka ayuu ugu talo galay afar beerood oo uu ku leeyahay duleedka degmada Ufayn oo 120 km u jirta magaalada Boosaaso.
Wasaaradda beeraha iyo waraabka Puntland ayaa sheegtay in roobabkaasi oo aan hore looga sii gaashaaman ay khasaare xoog leh gaarsiiyeen beeralayda. Wasiirad ku-xigeenka wasaaradda Siciido Xuseen ayaa Ergo u sheegtay in ilaa 600 oo beerood ay saameeyeen roobabaka iyo daadadka ka dhashay. Masuuliyiinta wasaaradda ayaa xusay in wax soo saarka beerahaas loo iib gayn jiray dhowr magaalo oo ay Boosaaso kamid tahay.
Ka sokow barakaca iyo dalagyada lagu khasaaray, waxaa kaloo jirta saamayn dhinaca deegaanka ah oo ay arrintani ku yeelatay dhul beeraadka ku yaalla degmada Ufayn, sida uu sheegayo guddoomiyaha degmada Cali Jamac. Guddoomiyaha ayaa sheegay in inta badan deegaannadii wax lagu beeran jiray ay hadda isu bedeleen togag ay biyuhu ka jeexeen, taas oo caqabad ku noqonaysa beerallayda.
